D’Fro, wéi Demokratie funktionéiert, wäert am Oktober mat der Woch vun der Demokratie nees an de Fokus geréckelt ginn. Uechter d’Land kréien d'Schülerinnen a Schüler Méiglechkeeten, fir un Atelieren an Aktivitéiten deelzehuelen an demokratesch Prozesser an hirem Alldag kennenzeléieren. E puer Schoule si schonn am Summer un d’Theema erugaangen – dorënner och d’Spillschoul zu Nidderkuer.
Faarweg Plakater als Ausgangspunkt
Mat Hëllef vu Biller a Symboler hunn d’Kanner Plakater gebastelt, déi verschidde Rechter duerstellen. Virun der Presentatioun huet d’Léierin Natalie Atten erkläert, firwat esou eng Aktivitéit wichteg ass
"Dir kennt Är Rechter – awer och net ganz. An dofir ass et wichteg, dass déi Grouss de Kanner hir Rechter erklären."
Kuerz drop war d’Presentatioun: D’Kanner hunn hir Iddien an d’Resultater vu gemeinsame Reflexiounen ugebueden.
Recht op Numm, Schutz a gesond Iessen
D’Lëscht vun de Rechter war divers: Vum Recht op eng Famill, e Spidol oder Schutz virum Krich, iwwer d’Recht seng Meenung ze soen, bis hin zum Recht op gesond Iessen.
Ee Grupp huet et esou zesummegefaasst:
"Mir hunn d’Recht e Numm ze hunn an e Kand ze sinn. Ech hu Recht eng Famill ze hunn. Mir hunn d’Recht op Schutz. Mir hunn d’Recht op de Planéit. Mir hunn Recht op gesond Iessen."
D’Zil: Kanner sollen sech mat hire Rechter vertraut maachen an esou ee Bewosstsinn entwéckelen, datt och si Stëmm a Schutz hunn.
Spillschoul als éischte Schrëtt
Wou a méi héije Klassen demokratesch Prozesser wéi e Klasserot méiglech sinn, geet et an der Spillschoul nach net esou wäit. Zu Nidderkuer gëtt mat klenge Schrëtt ugefaangen, spilleresch a kreativ. Esou léieren d’Kanner, datt Demokratie net nëmme fir Erwuessener gëllt.
Zum Schluss war sech d’Klass och eens, wat dat populäerste Recht ass:
"Mäi Lieblingsrecht ass ze spillen an ze chillen!"
