Nodeem den Europäesche Geriichtshaff an der Enquête vum Europaparlament géint déi fréier EU-Deputéiert Monica Semedo prozedural Feeler festgestallt hat, an de Constat vum “Harcèlement” opgehuewen hat, kéint dee Fall och Konsequenze fir änlech Plainten am Parlament hunn.
Änlech Klo virum EuGH
Um Donneschdeg huet sech dat europäescht Geriicht mam Fall vun der spuenescher Europadeputéierter Monica Silvana Gonzalez befaasst, déi am Januar 2023 vum Europaparlament wéinst Harcèlement fir 30 Deeg vun hire parlamentareschen Aktivitéite suspendéiert gi war.
Och si stellt, genee wéi déi fréiere Lëtzebuerger Europadeputéiert Monica Semedo - déi intern Prozedur vum Europaparlament a Fro. Een Urteel läit hei nach net vir.
Op Säite vum Parlament ass een iwwerdeems nach am gaangen d’Decisioun vum Geriicht am Fall vun der Lëtzebuergerin vum 12. Mäerz ze analyséieren.
D’Monica Semedo hat um Europäesche Geriichtshaff Recht kritt. Si hat dogéint geklot, datt d’Parlaments-Presidentin fir si eng Strof verhaangen hat, wéinst engem Fall vun Harcèlement géintiwwer engem Mataarbechter.
Concernéierte mat Konsequenze konfrontéiert
D’Parlament hätt Notiz geholl vun där Decisioun a géif se ënnersichen. Dee lafende Fall géing een net kommentéieren, huet et op eis Nofro aus dem Pressedéngscht vum Parlament geheescht.
An der Tëschenzäit kritt awer d’Affer vum Harcèlement, Konsequenzen ze spieren. Dee concernéierte Mataarbechter, deen d’Plainte géint d’Monica Semedo am Parlament gemaach hat, krut eng Email vum Personal-Service, an där him matgedeelt gëtt, hie kéint bis op Weideres net méi op eng finanziell Assistenz vum Parlament zielen. Déi Hëllef war him zougesot ginn, fir d’Käschte vun eventuelle juristesche Schrëtt an deem Fall ze droen.
Well d’Geriicht d’Entscheedung vum Parlament vun Abrëll 2023 géint d’Monica Semedo opgehuewen huet, wier keng Basis méi do, fir d’Assistenz fir dee Concernéieren.
Dat géif esou laang gëllen, bis prozedural Feeler, déi am Urteel festgestallt gi waren, korrigéiert wieren, an eng nei Decisioun en vue vun engem Harcèlement geholl wieren, heescht et am Schreiwes dat eis virläit.
Onkloer, wat mat weidere Fäll geschitt
D’Urteel am Fall Semedo an de Fait, datt d’Reegele vum Parlament net konform mat de Gesetzer sinn, hätt een Afloss op weider Plainten, sou eng Source aus dem Parlament.
Béid Säiten, Europadeputéiert a concernéiert Mataarbechter, wieren Affer vun deenen Irregularitéiten. Et misst awer virun iwwert d’Harcèlementer enquêtéiert ginn. Am anere Fall géingen d’Affer ignoréiert ginn.
Dat Europäescht Parlament bleift engagéiert am Kampf géint Harcèlement, esou iwwerdeems d’Äntwert vum Presse-Service op d’Fro, wéi dann elo mat weidere Fäll ëmgaange gëtt.
D’Froen, firwat ee Concernéierten elo déi Konsequenzen droe muss, bleift ouni Äntwert. Genee wéi déi, bis wéini d’Parlament decidéiert, wéi et soll viru goen.
