25 Persounen, ënnert hinnen och d’Marine Le Pen, gi verdächtegt tëschent 2009 an 2016 Sue vum Europaparlament verontreit ze hu fir d’Scholde vum Front National, wéi d’Partei deemools nach geheescht huet, ze reduzéieren. D’Suen déi den Europadeputéierte vum Parlament zur Verfügung gestallt gi fir Assistenten anzestellen, solle beim Front National dofir benotzt gi sinn, fir national Mataarbechter ze bezuelen - wat awer strikt verbueden ass.
Och d'Marine Le Pen wier "staark involvéiert"
D’Partei hat deemools iwwer 20 Millioune Schold. An enger Mail un d’Marine Le Pen, déi bei Perquisitiounen am Joer 2016 fonnt gouf, huet den deemolegen Tresorier vum FN der Le Pen geschriwwen, d’Schold wier nëmmen an de Grëff ze kréien duerch Aspuerunge mat Hëllef vum Europaparlament. D’Ënnersichungsriichter schwätze vun engem “systemateschen Detournement” vu Suen an deem d’Marine Le Pen staark involvéiert war.
Och den Jordan Bardella wier implizéiert
Dem Europaparlament no kéinten eng 6,8 Milliounen op dës Manéier verontreit gi sinn. Den aktuelle Parteichef Jordan Bardella ass zwar net ugeklot, wéi de Journalist Tristan Berteloot awer schreift, wier hien an d’Affär implizéiert, well hien deemools als parlamentareschen Assistent gefälschten Aarbechtsdokumenter ausgestallt hätt.
Marine Le Pen riskéiert 10 Joer Prisong
Verschidden Zeien an och Ugeklote sti mëttlerweil am oppene Konflikt mat hirer Ex-Partei an hunn am Virfeld scho belaaschtend Aussoe gemaach. Sollt si schëlleg gesprach ginn, riskéiert d’Marine Le Pen bis zu 10 Joer Prisong, 1 Millioun Geldstrof an och e Verbuet fir bis zu 10 Joer net bei enger Wal unzetrieden. De Prozess leeft nach bis de 27. November.