Am Dossier Ampacet stéing ee kuerz virun engem Deblockage vun der Situatioun, hat den Aarbechtsminister Georges Mischo (CSV) een Dënschdeg an der Chamber annoncéiert. Och den OGBL hat virgëschter gesot, datt warscheinlech eng Léisung a Siicht wier. Fir d’Regierung wier et ganz wichteg, datt de Sozialdialog funktionéiert, esou haut de Wirtschaftsminister Lex Delles
."An ech menge besonnesch an där heiter Zäit, fir elo véier Deeg viru Chrëschtdag nach an där doter Situatioun ze sinn, ass et ganz wichteg, datt hei eng Solutioun fonnt gëtt, fir och op där enger Säit datt d’Sécherheet vun der Societéit hei zu Lëtzebuerg, d’Sécherheet vun den Aarbechtsplaze kënnen ze garantéieren. An datt dat doten dann zu engem schlechten Ausgang vum Joer 2023 gehéiert, an datt 2024 mat der Ampacet, mat der Societéit mat de Salariéë besser weider geet."
Bei Ampacet an der Industriezon Wolser zu Diddeleng gëtt schonn zënter dem 27. November gestreikt, well d’Direktioun de Kollektivvertrag gekënnegt hat. De Weekend haten d’Direktioun an den OGBL erëm ugefaange mateneen ze schwätzen.
