En Demenzkranke kritt bei der Astufung bei der Fleegeversécherung aktuell déi Leeschtung, déi och eng aner Persoun mat de selwechte Gebriechlechkeeten, mee ouni Demenz ze gutt huet. D’ALA fënnt, datt e spezifesche Forfait fir Demenzpatiente besser wier. “D’Fleeg vun Demenzpatient geet dacks méi lues”, seet d’Lydie Diederich, Directrice vun der ALA. “Einfach, well de Betraffenen net ëmmer wierklech versteet, wat vun him verlaangt ass, an dofir méi Zäit brauch”.
Nach wier d’Hëllef, déi aktuell vun der Fleegeversécherung kënnt, awer gutt, ënnersträicht d’Lydie Diederich.
Doheem oder an enger Struktur?
Änleches gëllt och fir d’Plazen an d’Fleegestrukturen. U sech géifen et genuch Platzen zu Lëtzebuerg ginn, fënnt d’Directrice vun der ALA. Et géif awer u spezifesch Platze fir Demenzpatiente feelen. D’Lydie Diederich recommandéiert, de Betraffenen esou laang ewéi méiglech doheem ze halen. Dacks kënnt awer en Ament, wou dat net méi geet.
Versteesdemech fir de Kranken
Bei eis liewen eng 7.600 Leit, déi offiziell Demenz hunn. Deelweis ginn et Beréierungsangscht mat Demenzkranken, allerdéngs hätt d'Mentalitéit an de leschte Joren awer geännert, seet d'Lydie Diederich. Fakt wier awer, datt der vill einfach net wëssen, wei si mat engem Kranken ëm ginn. “Deem säin Ëmfeld gëtt da séier méi kleng”, bedauert d’Lydie Diederich.