Op enger Pressekonferenz am Wäissen Haus, wou nees d‘Douanes-Taxen dominéiert hunn, huet dem President seng Spriecherin Karoline Leavitt widderholl. Dosende Länner hätte mat den USA telefonéiert fir iwwert méiglech Accorden ze diskutéieren. Den Donald Trump wier zouversiichtlech, datt och China zu engem Accord mat den USA bereet ass.
China weist bis elo awer keng Zeechen, datt ee wéilt noginn, an huet seng Douanes-Taxen op US Importer gëschter op 125 Prozent eropgesat. Den Handelskrich tëscht den USA a China huet weider negativ Konsequenze fir d‘Wirtschaft. Den US Dollar ass op den déifste Stand zanter dräi Joer gefall.
