Am spéiden Nomëtteg koumen d’Parteispëtzte vum Walgewënner Nouveau Front Populaire zesumme fir doriwwer ze beroden, wéi et elo soll weidergoen. Si si sech eens, datt si den Usproch dorop hunn, eng Regierung an de Premier ze stellen.
Elo geet et awer dorëms, Detailer ze klären, an eng passend Persoun ze fannen. De Sozialistechef Olivier Faure huet bei France Info annoncéiert, datt een innerhalb vun enger Woch wéilt ee Kandidat oder eng Kandidatin presentéieren.
Jean-Luc Mélenchon wier keng Optioun
De Grënner vun der Lénkspartei La France Insoumise, de Jean-Luc Mélenchon, géing awer net Premier ginn, esou de Faure, well dësen ze ëmstridde wier. Eng aner Persoun aus der Lénkspartei wollt den Olivier Faure awer net ausschléissen.
Fir den Nouveau Front Populaire geet et elo och dorëms ze kucken, ob een eng Minoritéitsregierung op d’Bee stellt, déi da fir hir Projeten Allianzen an der Assemblée fanne muss oder op een eng Koalitioun kann agoen, wat awer de Moment schwéier ëmsetzbar schéngt, well zum Beispill La France Insoumise an d’Nach-Regierungspartei vum President Macron eng Zesummenaarbecht ëmmer nees kategoresch ausgeschloss hunn.
Max Tholl (Paräis)