Déi Lénk hunn hir Propose fir e mëttelfristeg nohaltege Pensiounssystem virun der Press widderholl.
Schaffend Leit am Nodeel
D’Piste fir d’Pensiounsreform, déi de Premier Luc Frieden a senger Ried zur Lag vun der Natioun genannt hat, wieren dem Marc Baum vun déi Lénk no ondemokratesch. Dës potentiell Ännerunge wieren nëmmen am Nodeel vun de Schaffende Leit.
Weider kritiséiert de Lénken Deputéierten, datt et keng Berechnunge géif ginn, wéi efficace dës Ännerunge fir d’Nohaltegkeet vum Pensiounssystem wieren.
Déi Lénk haten am Februar hir Propose vun der IGSS berechne gelooss.
Deementspriechend schloen si vir, den Deckel vun de Cotisatiounen opzehiewen, d’Pensioun selwer soll awer weiderhi gedeckelt bleiwen.
An anere Wierder soll eng Persoun, där hir Pai iwwert dem aktuelle Seuil vun 13.518 Euro läit, 8 Prozent vun deem Salaire an d’Pensiounskeess abezuelen.
Dës Mesure eleng géif eng 700 Milliounen Euro generéieren, ouni méi Depensë fir d’Pensiounskeess ze kreéieren.
De Staat an der Verantwortung
Iwwerdeems fuerdert de Marc Baum, datt déi Elementer vun der Pensiounskeess, déi näischt direkt mam Ausbezuele vun de Cotisatiounen ze dinn huet, vum Staat iwwerholl ginn. Dat wieren zum Beispill déi administrativ Fraise vun der CNAP.
“Déi ginn am Moment vun eise Cotisatioune bezuelt. Dat heescht, all Computer, all Schreifdësch, all Schreiwstull, deen an der CNAP benotzt gëtt, dee gëtt vun eise Cotisatioune benotzt.
Dat wier, déi Lénk no, eng Zweckentfriemung. De Staat sollt déi Fraisen iwwerhuelen, esou nach de Marc Baum.
