De Contournement vu Käerjeng wier “primordial” fir d’Entwécklung vun der Gemeng, esou den LSAP-Schäffe vun der Gemeng Käerjeng, Yves Cruchten. Mee et misst een de Problem och un der Wuerzel ugoen, an d’Leit dozou bréngen, manner Deplacementer ze maachen. Där Meenung ass och d’Barbara Agostino, déi betount, datt een net iwwerall Contournementen kéint hibauen.
De Marc Goergen wërft dem Mobilitéitsminister iwwerdeems vir, de geplangte Contournement als “Walcoup” ze benotzen. D’Pirate proposéieren awer nach weider Ëmgoungsstroossen, zum Beispill am Weste vun der Stad, zu Dikrech an zu Ettelbréck. Ëmmer ënnert der Konditioun, datt d’Natur net zerstéiert géing ginn.
DP a Piraten: "Pollueur, payeur"
Beim Theema Ëmwelt a Mobilitéit spillt natierlech och de Verbrennermotor eng wichteg Roll. D’ADR ass bekanntlech géingt ee Verbrenner-Verbuet. De Fernand Kartheiser huet awer betount, datt sech um Enn déi bescht Technologie soll duerchsetzen, egal op Elektro oder Waasserstoff.
Souwuel d’Barbara Agostino, wéi och de Marc Goergen sinn awer der Meenung, datt de “Pollueur” och de “payeur" soll sinn. D’Pirate wënsche sech deemno, datt d’Autossteier reforméiert soll ginn.
De Monorail als Alternativ zu Zuch an Tram?
Datt den ëffentleche Verkéier méi performant soll ginn, do waren eis Invitéë sech alleguer eens. Wéi dat soll gemaach ginn, do sinn d’Meenungen allerdéngs ausernee gaangen. De Fernand Kartheiser huet proposéiert, den Zuch ënnerierdesch duerch d’Stad ze féieren. Den Yves Cruchten hält awer wéineg dovun, “Tunnellen duerch d’Kasematten ze bueren”. Vill méi misst den Accès op d’Garen uechter d'Land verbessert ginn, esou de Käerjenger Schäffen.
Eng Alternativ zum Tram oder dem Zuch kéint och ee Monorail sinn. Souwuel d’ADR wéi och d’Pirate verschléisse sech sou enger Iddi net. Do wou Schinne leien, misste se och benotzt ginn, esou de Marc Goergen.
