Laut dem Wort ass dat 32 Säiten déckt Dokument vun der Etude Thewes a Reuter ausgeschafft ginn. Der grénger Deputéiert Sam Tanson no wier deen Avis eréischt d‘lescht Woch ugefrot ginn, also eréischt no der Decisioun vum Minister Gloden, déi hien am Dezember geholl hat.
Et géif sech och ëm déi selwecht Affekotenetude handele wéi déi, déi de Recours vun der Stad Lëtzebuerg ausgeschafft huet. “Mir hunn 3.000 Affekoten hei am Land. Wéi kéint den Auteur vum Avis eppes anescht schreiwen, wéi dat, wat hien a Recours geschriwwen huet?", sou d‘Sam Tanson op X.
Wann ee wierklech well Zweifel aus dem Wee raumen an d’Bierger*innen seriö hëlt da geet een aanescht fir. Mer hunn iwwer 3.000 Affekoten hei am Land. Wéi hätt den Auteur hei kénnen eppes aanescht schreiwen wéi am Recours?
— Sam Tanson (@SamTanson) January 31, 2024
Den Affekot Marc Thewes ass och Member vum Staatsrot. Hie selwer soll awer net um Avis matgeschafft hunn. An hirem Avis kommen d‘Affekoten zur Conclusioun, datt den Artikel am Code penal iwwer d‘Heescheverbuet nach ëmmer a Kraaft ass. De Parquet hat e puer Mol erkläert, datt dat net de Fall wier.
