Am leschte Schouljoer gounge grad emol 68 Jonker mat engem BTS-Infirmier aus der Schoul. Déi Zuelen nennt d'COPAS op enger Table ronde um Donneschdeg. Den Daachverband vun de Fleegeservicer hat déi Zoustänneg aus dem Secteur, ënner anerem och d'Sozial- a Gesondheetsministesch, genee wéi de Familljeminister Max Hahn invitéiert.
De grousse Constat ass, datt d'Penurie am Secteur beonrouegend wier. Si géif verstäerkt ginn duerch d'Ofhängegkeet vu Mataarbechter:innen aus der Groussregioun. D'COPAS fuerdert, datt Lëtzebuerg méi Efforte mécht fir de Fleegeberuff attraktiv ze maachen.
D'COPAS selwer wëllt bei der Formation en cours d'emploi besser berufflech Perspektive bidden an och den Accès vu sougenannte Quereinsteiger an de Beruff vereinfachen.