Op Videoopname gesäit een e Journalist vun der BBC, wéi hien hei um Kierchbierg virum Europaparlament e Mann konfrontéiert. Seng Identitéit confirméiere si duerch en Telefonsuruff genee an deem Abléck op säin Handy.
En Undercover-Journalist hat sech als Refugié ausginn a virdru via Telefon mam Verdächtege verhandelt, fir iwwert d‘Grenz a Groussbritannie geschmuggelt ze ginn. De Mann, deen am Milieu als "The Mountain", also de Bierg, bekannt wier, streit alles of.
Hie soll sech am Primo-Accueil um Kierchbierg opgehalen hunn a wier selwer Migrant mat onklorem Status. D‘BBC huet déi franséisch Police informéiert.
Op eis Nofro hin huet den Inneministère matgedeelt, datt ee vun dëser BBC-Reportage Kenntnis geholl hätt an d'Informatioune ganz eescht géing huelen. Weider Informatioune kéint een zu dësem Ament awer net ginn.
Dat Ganzt kann een op bbc.com noliesen.