Nieft den Artisten, déi op der Affiche vun den Transmusicales 2023 stinn, entdecke mir hei och deen neien Album vu Mo' Horizons, deen de 6. Oktober erauskoum. Déi däitsch Djen a Soundtüftler begeeschteren elo scho 25 Joer mat hirem elektronesche Groove, dee vu villen Influenze geniert ass.
Zu den Artisten an Artistinnen, déi op den Trans optrieden, entdecke mir d’Ana Lua Caiano. Eng Trommel, e Synthi, Handklappen a virun allem eng Loop-Station, mat där si hir Lidder an Echt-Zäit opbaut. Déi jonk Portugisin vu 24 Joer huet e remarkabelen Debut-Album “Se Dançar É Só Depois’” erausbruecht, dee fir d’éischt a Frankräich op der Bün ze gesi war.
Bam Bam's Boogie ass en Trio vu Berlin, deen zesummegestallt ass vum Amerikaner Kiko King um Gesang, aus Italien de Jacopo Aluzzi (Bass, Claviers, Programmatioun) a mam Giotto Beattz aus Irland op der Batterie. Hir Elektro-Soul-Vaudou Musek erënnert un den Tricky.
En Artist, dee sech op der Kräizung vun de populäre, traditionellen, klasseschen an avantgardistesche Museke beweegt, ass de Raül Refree. Komponist, Museker a Produzent vu Barcelona. “el espacio entre” heescht säin Disk vun dësem Joer. Dës Musek erfuerscht d’Perte, de Vide, de Raum tëschent deem, wat mir waren an deem, wat mir sinn …
Och dëst Joer op den Transmusicales vu Rennes si Yalla Miku. D’Museker kommen aus der Schwäiz mat engem Refugié aus Erythrea, aus Marokko an Algerien. Punkeg a multikulti!
Indonesesche psychedelesche Funk héiere mir vun Nusantara Beat, e Sextett, deen zu Amsterdam baséiert ass mat Memberen aus anere Gruppen, dorënner Altın Gün. Si proposéieren e Patchwork vu villen Influenzen: Perkussiounen aus dem Gamelan, Surf Gittaren a funky Bass-Linnen, an net ze vergiessen: déi schéi Stëmm vun der Megan de Klerk.
Mokhtar beweege sech am Beräich vum orientalesche Folk, gespillt vu Museker, déi zu Rennes doheem sinn. En excellente Cocktail aus enger funky Jazz-Fusioun, Afro-Soul an anere Gewierzer!
D’Musek huet nach ëmmer, esou wéi aner Konschtformen och, den Zäitgeescht erëmgespigelt, ass politesch a gesellschaftskritesch. Déi dräi jonk Londoner vun Insencere si keng Engelen, och keng Dämonen, just Jonker vun 20 Joer, déi e verdammt gudde Sënn hu fir d’Melodië vun der Generation Z hirem Gemittszoustänn, schreift de Virstellungstext vum Festival.
En anere Jonken, dee via Internet bekannt gouf (grad wéi Insencere), ass de Fran Vasilić, deen iwwer véier Millioune Follower huet. De jonke kroatesche Crooner schwätzt vun der Léift, dat wuel populäersten Theema vun der Pop-Musek.
Playlist:
1. Mo' Horizons - Mango Woman (feat. Gyedu-Blay Ambolley) - Mango
2. Mo' Horizons - I Can't Sleep (feat. Noam Bar Azulay) - Mango
3. Ana Lua Caiano - Mão na Mão - Mão na Mão - Single
4. Bam Bam's Boogie - Mescaline - Seance - EP
5. Raül Refree - Lamentos de un rescate - el espacio entre
6. Beverly Glenn-Copeland - La Vita - Transmissions: The Music of Beverly Glenn-Copeland
7. Yalla Miku - Tortije - Yalla Miku
8. Nusantara Beat - Djanger - Djanger / Borondong Garing
9. Dengue Fever - Ethanopium - Dengue Fever (Deluxe Edition)
10. Mokhtar - Disco Chamo (feat. Théo Morin & Marine Quinson) - P#3 - EP
11. Insincere - Jack's Melody - Jack’s Melody
12. Fran Vasilić - Hypotheticals - Single