Ryanair flitt vun Oktober un, véier mol d'Woch vu Lëtzebuerg op Barcelona. D'Offer fir d'Fluchverbindunge mat Porto a Lissabon soll Enn 2017 ausgebaut ginn. Porto soll da sechs mol d'Woch vum Findel aus ugeflu ginn a Lissabon fënnef mol. Nieft deene Stied sinn nach London-Stansted, Madrid a Mailand-Bergamo am Programm vu Ryanair.
Bis elo wier een zefridde mat de Performancen, déi een zu Lëtzebuerg gemaach hätt, esou de Yann Delomez, responsabel fir Regionalmarketing vu Ryanair. Si hätte réischt Ufank November 2016 mat hiren Operatiounen ugefaangen. An deenen zwee Méint vun 2016 hätt ee schonn 32.000 Passagéier gezielt. Fir 2017 géif Ryanair 450.000 Passagéier zu Lëtzebuerg erwaarden.
Ännerungen um Findel
De Bedreiwer vum Fluchhafe Lëtzebuerg, d'Gesellschaft Luxairport, wäert dëst Joer eng Rei vun Ännerungen ëmsetze, fir de méi héije Fluchpassagéierzuelen mat deenen ee rechent, gerecht ze ginn, esou den Direkter Johan Vanneste.
Nach virum Summer sollt den Terminal B fäerdeg gestallt ginn. "An deem Projet schafe mir zwou Plazen, déi un d'Low-Cost-Fligeren ugepasst sinn." Do géifen et keng Passerelle ginn, mä d'Passagéier misste selwer duerch d'Entréën an de Fliger goen. Donieft wéilt ee verschidden Deeler vum Fluchhafe vergréisseren an eventuell och automatesch Passkontrollsystemer um Findel installéieren.
Mat hirer aggressiver Präispolitik setzt déi iresch Bëlleg-Airline Ryanair hir Konkurrenz an Europa scho méi laang ënner Drock.
Luxair gesäit sech gutt opgestallt
Déi national Fluchgesellschaft Luxair wollt aktuell Annonce vu Ryanair op Nofro hin net kommentéieren. Luxair hätt sech schonn 2010 eng nei Präisstruktur ginn, fir déi eegen Offer méi attraktiv ze maachen an d'Arrivée vu Low-Cost-Fluchgesellschaften z’antizipéieren, esou de responsabelen Direkter fir Marketing vum Luxair-Group, Marc Gerges.
Et geséich ee sech och weiderhi gutt opgestallt, fir mat Low-Cost-Fluchgesellschafte mat ze halen. Dernieft hätt d'Luxair virun engem Joer méi Transparenz beim Fluchreservéirungssystem um Internetsite geschaaft. Doriwwer eraus géif ee weider strategesch wichteg Destinatiounen renforcéieren. Ënner anerem hätt d'Luxair dofir d'lescht Joer en zousätzleche Fliger vum Typ Q400 vum Produzent Bombardier kaaft, esou de Marc Gerges.
Wuesstëm a Laangstreckeflich
Ryanair wier de Moment a Verhandlunge mat anere Fluchgesellschaften, fir zesummen eng Offer vu Laangstreckeflich unzebidden, esou de Yann Delomez. Tickete fir sou Volle solle laangfristeg via d'Websäit vu Ryanair ugebuede ginn. Dës Offer soll och den ëmgedréinte Wee méiglech ginn. Zum Beispill fir Passagéier, déi Lëtzebuerg aus den USA via Dublin wéilten ufléien..
Doriwwer eraus wéilt Ryanair zu Lëtzebuerg an um Fluchhafe Frankfurt-Hahn wuessen. Béid Fluchhäfen kéinten ouni Problem niefteneen existéieren an och profitabel sinn.
Et wéilt een awer en Equiliber tëscht Low-Cost- an traditionelle Fluchgesellschafte um Findel behalen an d'Zuel vun den Destinatiounen erhéijen, déi vu Lëtzebuerg aus ugeflu ginn, sou de Johan Vanneste.
D'Zukunft vu Frankfurt-Hahn
Den defizitäre Fluchhafen Frankfurt-Hahn wier aktuell net sou attraktiv wéi e kéint si, mengen iwwerdeems déi Responsabel vu Ryanair. Dat géing un héijen Taxe leie, déi Fluchgesellschaften an Däitschland misste bezuelen, esou de Yann Delomez.
De Fluchhafen vu Frankfurt Hahn géif awer héchstwahrscheinlech un de chinesesche Mëschkonzern HNA verkaf ginn. Dat huet d'Landesregierung vu Rheinland-Pfalz de Medie matgedeelt. Wann d'Detailverhandlunge positiv géifen ofgeschloss ginn, da kéint de Kafvertrag nach Mëtt Februar ënnerschriwwe ginn.
Ryanair géing aktuell och keng negativ Entwécklung wéinst dem geplangten Austrëtt vu Groussbritannien aus der Europäescher Unioun spieren. Bei LuxairGroup schwätzt een dogéint vu manner Businessflich, zënter der Annonce vum Brexit d'lescht Joer.