An der gesonder Ernärung spillt Fësch eng grouss Roll an der Preventioun vun enger Rei Krankheeten. Dir kritt Iddien a Rotschléi, wéi Dir dës wäertvoll Liewensmëttel eraussichen an op wéi eng Fassong an Ären Iessplang abaue kënnt ouni de Budget ze sprengen.
"D’Recommandatioune par rapport zu der Gesondheet si fir 200 g Fësch d’Woch ze iessen an dovun eng Kéier fettege Fësch, wéi Saumon, Dorade royale, oder Thon, an dat schléit an de Portefeuille, mee et ginn och fetträich Zorten, déi net esou deier sinn.
De Moment si grad Makréil, Sardinnen, Frell oder Hierken an der Saison. De Chinchard ass en Insidertipp an ass eng méi bëlleg Versioun vun enger Dorade royale. Bei de Japaner ass en extra beléift a gëtt réi oder marinéiert verschafft.
Déifgefruere Fësch ass méi präiswäert wéi frësche Fësch, Dir hutt keen Offall an en hält sech laang.
Iesst eng Kéier d’Woch eng Béchs mat Saumon, Thon oder Makréil, et ass präiswäert an d’Närstoffqualitéit ass déi selwecht wéi bei frëschem Fësch. Bei Sardinnen huet een esouguer en Zousaz u Kalzium dran, well d’Sprenze mëll sinn a roueg kënne matgiess ginn. Et ass praktesch Fëschbéchsen an der Reserve ze hunn, se huele keng Plaz a loosse sech liicht op e Picknick oder op d’Aarbecht mathuelen. Se kënnen op vill Fassonge verschafft ginn, z. B. Sardinnen op der Pizza oder Muffins mat Ricotta, Herbes de Provence an Thon".
Explikatioune mat der Ernärunsgberoderin Lis Muller
Referenzen:
Ducasse, A., & Neyrot, P. (2011). Nature simple, sain et bon - Mers et océans pêche responsable. Alain Ducasse
Orieux, G. (2025). Cuisiner la mer - Editions de la Martinière
Santé, C. S. (2025, juin 17) https://www.hgr-css.be/fr/avis/9805-9807/recommandations-alimentaires-pour-la-population-belge-2025
