Centre de ressources - Kannerbedeelegung entwéckelen a fërderen
An der Kontinuitéit vum nationale Plang fir déi non-formal Bildung ass 2023 e Réseau de Centres de Ressources opgestallt gi fir pädagogesch Begleedung a spezifesche Beräicher unzebidden an esou non-formal Bildungsmethoden ze fërderen.
Am Kannermusée PLOMM dréit sech alles ëm d’Kannerbedeelegung a ronderëm d’Froen: Wéi kënne mir d’Kanner wäertschätzen a mat hinnen zesummen eis Welt vu muer opbauen? Wéi kënne mir si deelhuele loossen un Entscheedungsprozesser a si als Bierger mat eegener Stëmm consideréieren?
An de Projete gëtt Raum fir Kanner geschaf, fir si dobäi ze ënnerstëtzen hir Iddien ze äusseren an dofir och déi néideg Kompetenzen ze entwéckelen. Dës partizipativ Methoden an Usätz gi gesammelt, fir se dann op nationalem Niveau ze deelen. D’Ekipp vum Kompetenzlabo riicht sech mat enger Offer u Weiderbildungen, Fachbegleedungen a pädagogeschem Material zum Theema Participatioun un Institutiounen, Personal aus dem Bildungssecteur an och Studenten aus dem edukativen a kënschtleresche Beräich.
