Am Abrëll 2023 hätt et zum Amoklaf komme sollen. De jonke Mann vun haut 20 Joer hat annoncéiert, méi Leit wëllen ëmzebréngen, wéi bei engem Amoklaf an den USA am Joer 2007, deen 32 Leit net iwwerlieft haten. Do virdru wollt hie säi Papp dout maachen.
“Ech wollt dat ni konkret realiséieren”
Hien wéilt sech entschëlleg an hien hätt sech an de leschten zwee Joer gebessert. Dat waren déi lescht Wierder vum groussen, gourege jonke Mann un d’Geriicht. Dat meescht vun deem, wat hien am August 2022 geschriwwen hätt, wier Fantasie gewiescht. Hien hätt ni wierklech probéiert, eppes ze maachen, sou den Ugekloten.
Op de Mobbing vu Schüler aus dem Lallenger Lycée technique hätt hie mat enger Mëschung aus Provokatioun, Ideologie a Gläichgültegkeet reagéiert. “Wollt Der zouschloen?”, huet de President vum Geriicht de jonke Mann gefrot. “Neen!”, war seng Äntwert.
Psychologesch Ënnerstëtzung wier néideg
Do virdrun hat d’Vertriederin vum Parquet op eng Fro vum Dag virdru vum Riichter geäntwert, firwat d’Justiz sengerzäit net direkt ageschratt wier. Et hätt e puer Inconnue ginn an een eréischt kënnen aktiv ginn, wéi den Dossier stoung.
Et wier een awer beonrouegt gewiescht, wéinst der Gravitéit vum Geschriwwenen. Wat d’Infraktioun ugeet, wiere just Menacen zeréckzebehalen. Et géif keng speziell zu engem Amoklaf ginn. De jonke Mann hätt an der Tëschenzäit e Wee gemaach, mee d’Gefor wier nach net aus de Féiss, sou datt eng Therapie néideg wier.
Gefor vu Radikaliséierung am rietsextreme Milieu
An déi selwecht Richtung war um Ufank vun der Sëtzung e Psychiater gaangen, deen de Beschëllegten zejoert zweemol gesinn hat. Virun zwee Joer hätt de jonke Mann e Risiko duergestallt. Hien wier net krank, bräicht awer en Traitement vun der Gewalt an dem Haass an him. Wann et net zu enger Behandlung kéim, wier de Pronostic reservéiert. Et bestéing de Risiko, datt sech de jonke Mann enger Gruppéierung uschléisse géif zum Beispill aus dem rietsextreme Milieu.
D’Urteel gëtt den 22. Mee gesprach.
