Ufeindungen op de soziale Medie wieren un der Dagesuerdnung. Och op oppener Strooss oder a Schoule géif et méi dacks zu Aggressioune kommen. Am Ausland wier d’Lag méi schlëmm, mee et wier wichteg elo opzepassen, datt déi juddefeindlech Tendenzen hei am Land géifen "ënnert Kontrol"” bleiwen, sou nach den David Weis.
Bannent der Europäescher Unioun wier déi Lëtzebuerger jiddesch Communautéit nämlech déi, déi am mannste geschützt wier, gëtt de President vun de liberale Judden ze bedenken, och well ee bis elo de Besoin net sou verspuert hätt.
"De Problem ass natierlech, wann all d'Synagogen am Rescht vun der Europäescher Unioun, ech mengen a gewësse Länner, wéi an der Belsch a Frankräich, souguer vun der Arméi geschützt ginn, da riskéiere mir iergendwann d'Schwaachstell ze sinn."
Just eng Fro vun der Zäit?
Nach wier näischt geschitt, mee dat kéint och just eng Fro vun der Zäit sinn, esou den David Weis. Eng Aschätzung déi de Leit Angscht mécht. Verschiddene géifen hir Kanner net méi an de Reliounsunterrecht schécken oder an de Gottesdéngscht goen, well si sech net méi sécher fillen.
Mat der Police hätt een eng gutt Zesummenaarbecht, seet den David Weis, mee déi hätt och limitéiert Moyenen. Néideg wier am Fong eng konsequent Iwwerwaachung vun de Synagogen am Land. Bei der 70-Joer-Feier vun der Escher Synagog de leschte Freideg wier awer zum Beispill guer keng Police-Presenz assuréiert gewiescht.