Vun 13 Joer u muss een also - genau wéi mam Vëlo - op der Strooss oder um Vëloswee fueren. Um Trottoir ze fueren ass net erlaabt.
Fir deen, dee sech net un déi Reegelen hält, gëllen och déi selwecht Geldstrofen. Zum Beispill muss ee 74 Euro bezuelen, wann een anzwousch fiert, wou een net dierf fueren, esou de Claude Paquet.
Ëmgebauten E-Scootere gi confisquéiert
Fir d‘E-Scootere gëllt iwwerdeems eng Vitesslimitt vu 25 Stonnekilometer. E-Scooteren, déi ëmgebaut goufen, fir méi séier ze fueren, gi confisquéiert. De Claude Parquet erënnert och drun, datt d‘Assurancen net gräifen, wann ee mat esou engem E-Scooter een Accident huet.
Eenzel EU-Länner, dorënner och Lëtzebuerg, schloen och eng Harmoniséierung vir, wat déi technesch Reglementatioun vun E-Scooteren ugeet.
"Datt déi Gefierer, déi een ze kafe kritt, korrekt sinn, datt déi net méi wéi déi 25 Kilometer an der Stonn ginn an dass ee sécher ka sinn, dass dat ee Gefier ass, wat och fonctionéiert an net geféierlech ass."
Keng Immatrikulatiounsplacke virgesi
Immatrikulatiounsplacke fir E-Scootere sinn iwwerdeems net virgesinn, ënnersträicht nach de Claude Paquet. Dat misst een dann och fir d‘Vëloen aféieren.
"Alleguer d'Touristen, déi mat engem Vëlo kommen, d'Kanner, déi e Vëlo hunn, missten dann och alleguer eng Immatrikulatiounsplack kréien."
Déi Prozedur géif och technesch Kontrolle viraussetzen, esou nach de Claude Paquet.
