Op d‘mannst 30.000 Mënsche sollen evakuéiert gi sinn, mellt d‘Migratiounsorganisatioun vun de Vereenten Natiounen.
Besonnesch vill Doudesaffer soll et an der Hafe-Stad Darna ginn. Do sinn zwee Staudämm gebrach an eng grouss Flutwell huet vill Leit matgerappt.
Experten no sinn dës Onwiederen eng kloer Konsequenz vum Klimawandel. D‘Iwwerschwemmungen hätten awer och vill mat der politescher Situatioun a Libyen ze dinn. Jore laang wier net genuch an d‘Infrastruktur vun de Staudämm investéiert ginn.
Plazeweis 414 Liter Reen de Quadratmeter
De Stuerm "Daniel", dee schonn a Griicheland Zerstéierungen hannerlooss huet, ass schonn zanter e puer Deeg an Europa ënnerwee. Am Mëttelmier huet en sech dann nach eemol intensivéiert an ass zu enger Zort „Medicane“ ginn – dat ass ee Mëttelmier-Stuerm, deen Ähnlechkeete mat engem tropesche Wierbelstuerm huet.
Meteorologe schwätze vu plazeweis 414 Liter Reen de Quadratmeter, déi e Sonndeg a Libyen gefall solle sinn. Dat ass ongeféier dräi mol esou vill Waasser wéi d'Héichwaasserkatastrof am Arthal vu virun zwee Joer.
D’Vereenten Natiounen hunn eng international humanitär Hëllefs-Aktioun an d’Weeër geleet. Am Iwwerschwemmungsgebitt ass och schonn Hëllef ukomm, ënnert anerem aus Ägypten. Mee d’Rettungsefforte si schwiereg, et gëtt e Biergerkrich an d’Land ass an zwou Regierunge gedeelt.
