Bis ewell huet Marokko offiziell nëmme Katar, déi Vereenten Arabesch Emirater, Groussbritannien a Spuenien ëm Hëllef gefrot. Mee och d’Lëtzebuerger Hëllefsorganisatioune preparéiere sech fir ze hëllefen.
Prett fir den Urgence-Modus
Dorënner d‘UNICEF, déi eigentlech programmatesch Aarbecht a Marokko leescht a Büroen op der Plaz huet. Elo géing ee sech prett hale fir an den Urgence-Modus ëmzeschalten, erkläert de Pol Heber vun Unicef Lëtzebuerg.
"Dat heescht mir si preparéiert an den Avantage natierlech vun eiser Organisatioun ass, datt mer och, leider, muss ee soen, eng enorm Expertis an esou Situatiounen hunn."
Physesch a psychologesch Ënnerstëtzung
Dem Pol Heber no géingen d’Famillen a Kanner op der Plaz elo virun allem Hëllefsmëttel, wéi Drénkwaasser brauchen, seet de Pol Heber. Waasserleitungen an aner Infrastrukture wieren deelweis zerstéiert ginn. Blesséiert Kanner bräichten iwwerdeems och Medikamenter a Verbandssachen.
Doriwwer eraus wier a sou Fäll psychosozial Ënnerstëtzung néideg. Virun allem Kanner wieren traumatiséiert duerch dat wat se matgemaach hunn.
"Fir hinnen ze hëllefen déi Nuecht vun deem Äerdbiewen och kënnen ze veraarbechten a mir hoffen hinnen och sou séier wéi méiglech e bëssen Normalitéit kënnen ze ginn."
Bëssen Alldag zréck ginn
Educatioun wier e wichtegen Deel dovunner, ënnersträicht de Pol Heber, fir de Kanner bëssen den Alldag zréck ze ginn.
"Eis Unicef-Kolleegen op der Plaz, si lo grad amgaangen all déi Moossnamen en Place ze sëtzen, déi am Fong d'Kanner brauchen, fir dat séier déi Hëllef kréien, déi se verdéngen."
Wéi vill Leit den Ament op der Plaz si konnt de Pol Heber net soen. Éischten Informatiounen no wieren déi Infrastrukturen déi d’Hëllefsorganisatioun an de leschte Joren en Place gesat huet iwwerdeems net beim Biewe beschiedegt ginn.
