Philip Crowther zu New York
Do huet sech eppes verännert am Donald Trump sengem Kapp. Frustréiert, schéngt et, nodeem säi Sommet mam russesche President Wladimir Putin net zu konkreete Resultater gefouert huet. Seng Astellung ass méi pro-ukrainesch ginn. Elo seet hien, datt d’Ukrain mat europäescher an NATO-Hëllef säi ganzen Territoire kann zeréckerueweren. Rezent hat hien nach en Tosch vun Territoire mat Russland recommandéiert.
Bei der UNO huet de Wolodymyr Selenskyj vu sengem positive Gespréich mam Trump erzielt, mee och en Opruff gemaach fir méi Waffe geliwwert ze kréien.
"Dir wësst et: d’internationaalt Recht funktionéiert net richteg ouni Frënn mat Muecht, déi sech dofir asetzen. An och dat geet net duer ouni Waffen. Et ass schrecklech, mee ouni Waffe wier et nach méi schlëmm. Et gëtt keng Sécherheetsgarantien ausser Frënn a Waffen."
Och grouss BRICS-Staate sollen hëllefen
Mächteg UNO-Memberlänner wéi Brasilien, China, an Indien ënnerstëtzen d'Ukrain net. China weist sech neutral mee hëlleft Moskau finanziell a militäresch. De Selenskyj wëllt eng méi vereente Front.
“Am Endeffekt musse mir all eppes fir de Fridde maachen, mir als Vereenten Natiounen. Wann ech gelift sot eppes wärend Russland dëse Krich verlängert. Sot eppes géint de Krich."
De russeschen Ausseminister Sergei Lawrow ass och den Ament an de Couloirë vun de Vereenten Natiounen ze gesinn. Getraff huet hie sech mam US-Ausseminister Marco Rubio. Hie soll de Lawrow opgeruff hu fir d'Gewalt géint d'Ukrain ze stoppen.
