D‘Pirate géifen deemno hir dräi Sëtz verléieren, déi si bei de Walen zejoert kruten, an hätte keen Deputéierte méi. Si hunn der elo nëmmen nach zwee, nodeems de Ben Polidori bei d‘LSAP gewiesselt ass.
Déi zwou Regierungsparteie CSV an DP géifen alle béid ee Sëtz verléieren. D‘CSV hätt der dann nach 20, an d‘DP nach 13. Op 13 Sëtz kéim och d‘LSAP: Ee Plus vun 2 par rapport zu de leschte Walen.
Och déi gréng géifen 2 Sëtz méi wéi virun engem Joer kréien, a mat 6 Mandater nees d‘Fraktiounsstäerkt erreechen. D‘ADR géif ee Sëtz bäikréien an op 6 Sëtz kommen. An déi Lénk géife bei hiren 2 Sëtz bleiwen.
Dëse Sondage gouf an der leschter September-Woch gemaach. Eng 1.870 Leit waren iwwert Telefon an Online befrot ginn.