Wéinst dem Stuerm Nils stoungen um Donneschdegmoie fënnef Departementer ënnert der héchster Warnstuf, wann och wéinst ënnerschiddleche Geforen. D'Pyrénees-Orientales an d’Aude wéinst de staarke Wandstéiss, Gironde a Lot-et-Garonne wéinst Iwwerschwemmungen an d’Alpendepartment Savoie wéinst akuter Lawinegefor.
Ee Camionschauffer koum ëm d‘Liewen
Eng 30 Departementer stinn ënner der zweethéchster Warnstuf an de Groussdeel wäert et och nach bis muer, Freideg, bléiwen. De Stuerm zitt den Ament weider Richtung Mëttelmier. Bis elo koum eng Persoun wéinst dem Wand ëm d’Liewen. E Camionschauffer ass am Südwesten déidlech verongléckt, wéi een décken Aascht vun engem Bam op säi Gefier gefall ass. Nach eng weider Persoun gouf uerg blesséiert, och hei war et ee Bam, deen an d’Strooss gefall ass.
Schoulen deelweis zou
Och de materielle Schued ass grouss, um Donneschdegmoie waren eng 900.000 Stéit am Südweste vum Land ouni Stroum. Météo France sot, d’Stäerkt vum Stuerm wier aussergewéinlech. D’Vize-Presidentin vum Departement Aude, d’Tamara Rivel, sot et hätt een zanter 2009 kee Wierder wéi dëst gesinn.
Wéinst dem Stuerm ass och den Zuchtrafic a wäiten Deeler vum Land staark ageschränkt. Plazeweis sinn haut och d’Schoulen zou bliwwen.
Och Spuenien a Portugal nees getraff
De Stuerm huet och a Spuenien an a Portugal fir Schued gesuergt. A Portugal ass eng wichteg Autobunnsbréck tëschent Lissabon a Porto agefall. Déi wäert elo e puer Woche gespaart sinn.
Och a Katalonien gouf eng rout Alerte ausgeruff. Op d‘mannst 7 Mënsche sinn do blesséiert ginn, duerch Beem déi ëmgefall sinn an eng Mauer, déi an e Koup gefall ass.
Ronderëm Barcelona si Wandspëtzt vu bis zu 167 Kilometer an der Stonn gemooss ginn.
