Dësem Accord waren awer zéi Verhandlunge virausgaangen. Virun allem Däitschland hat ëmmer nees Wënsch, fir den entspriechenden Text ze änneren. Berlin wollt e manner strengen Text, fir der eegener Ekonomie, wéi et ausgesäit, manner ze schueden.
Hoffnung, datt Russland manner Gas verkafe kann
Woubäi d’Sanktioune géint de russesche Flësseggas als duerchaus schaarf kënnen ugesi ginn. Sou soll et zum Beispill an Zukunft verbuede sinn, datt en Hafe wéi dee belsche vu Zeebrugge genotzt gëtt, fir dës Zort vu russeschem Gas mat Schëffer an Drëttlänner ze bréngen. Dat kéint dozou féieren, datt Russland manner Gas verkafe kann an domat manner Suen a seng Rëschtungsindustrie an an de Krich géint d’Ukrain stieche kann.
Urusla von der Leyen begréisst Duerchbroch
Trotz dem ofgeschwächten Text huet d’nach- a warscheinlech och zukünfteg EU-Kommissiounspresidentin Ursula von der Leyen den Duerchbroch op deem Punkt begréisst.
Si huet vun engem staarke Moossnamepak geschwat, dee Moskau den Zougank zu Technologie méi schwéier maache géif, déi Russland awer fir de Krich an der Ukrain bräicht; dobäi kéim de Minus u Recetten.
Accord huet an Däitschland Sträit ausgeléist
Deen neie Mesurëpak war schonn Ufank Mee vun der EU-Kommissioun virgeschloe ginn. Datt et annerhallwe Mount bis zum Accord gedauert huet, hat mat de Bedenke vun däitsche Säit ze dinn. Zu Bréissel war Däitschland dowéinst an der Lescht iwwregens als neit Ungarn ugesi ginn, well et net séier eppes mat de Sanktioune gouf.
An der däitscher Regierung gouf et heiwéinst, wéi et schéngt, och op en Neits Sträit, dës Kéier tëscht dem gréngen Ausseministère an dem roude Kanzleramt.