An de Chamberkommissioune fir Ëmwelt a fir Landwirtschaft gouf um Donneschdegmoie gouf den nationalen Nitrat-Rapport fir d’Period 2020 bis 2023 presentéiert.
An deem Rapport steet, datt vun de Lëtzebuerger Uewerflächegewässer keent an engem ganz gudden oder gudden Zoustand ass. D’Hallschent vum Grondwaasser ass wéinst der Belaaschtung an engem schlechten Zoustand.
Och där neier Regierung wier doru geleeën, datt all Acteuren zesummen d’Zil vun enger Verbesserung vun der Waasserqualitéit sollen erreechen, esou den Ëmweltminister Serge Wilmes.
D’Landwirtschaftsministerin Martine Hansen huet ugekënnegt, datt d’Vertrieder vun der Landwirtschaft den Nitrat-Rapport d’nächst Woch solle virgestallt kréien, an duerno soll doriwwer diskutéiert ginn.
"Déi Contrainten, well et sinn awer Oplagen, déi mussen d’Bauere verstoen. Dat heescht si mussen och esou sinn, datt et definitiv eppes bréngt. Zum Beispill verschidde starr Datumer, déi bréngen net ëmmer eppes, déi sinn heiansdo kontraproduktiv, wann no deem starren Datum op eemol alles ausbruecht gëtt, well ech virdrun net konnt."
D’Regierung hat den neien Nitrat-Rapport am August op Bréissel geschéckt. Dëse Rapport koum zur Conclusioun, datt den Asaz vun Dünger a Piff duerch d’Landwirtschaft misst reduzéiert ginn, fir eng Verbesserung vun der Waasserqualitéit ze erreechen.