Fir den DP-Politiker bleift et bei der Grondausriichtung vum Gesetz vu virzejoert. D’Riedercher sollten awer nach besser anenee gräifen, fir méi erschwéngleche Wunnraum am Land ze schafen.
D'Gemenge sollen sech och engagéieren
Well de Risiko vun Aarmut bei Elengerzéiende méi héich ass, sinn ënner anerem dës Persounen am Viséier vun den Optimisatiounen. Dowéinst wieren d'Attributiounskrittären och dorop ausgeriicht.
Donieft wëll de Wunnengsbauminister, datt sech d’Gemenge méi zu erschwénglechem Wunnraum engagéieren. Dat géif nämlech zu enger sozialer Politik vun enger Gemeng dozougehéieren.
D’Gemenge sollte vun deene selwechte Konditioune profitéiere kënne wéi aner Acteuren, betount de Claude Meisch. A mécht eng Rechnung: Wann all Gemeng an der Moyenne 5 där Wunnenge pro Joer schafe géif, da géif et 500 därer méi ginn. Bei de Gemenge bestéing allzäit de Wëllen, fir Acteur ze ginn.
Privat Promoteure sollen net méi ausgeschloss ginn
Doriwwer eraus géif och un enger neier Versioun vum Pacte logement geschafft ginn. Da sollen, wann et dem Minister no geet, privat Promoteuren um Gebitt vum erschwéngleche Wunnraum net méi ausgeschloss sinn, an et solle cibléiert Wunnenge geschafe gi fir Jonker, Senioren oder Salariéen.
“Et ass net fir d’Kadere vun der Entreprise, ausser si géife ganz wéineg verdéngen, mee et ass wierklech fir déi, déi eligibel sinn, ënnert hire Beschäftegten, deenen och kënnen eng Wunneng ze bidden.”
D’selwecht wéi bei de Gemenge wier och bei Betriber aus zum Beispill enger Aktivitéitszon oder aus engem Secteur den Intressi un erschwénglechem Wunnraum grouss, sou nach de Claude Meisch.
