Max Tholl (Paräis)
Um 10.30 Auer wäert den Emmanuel Macron mat de Vertrieder:innen vum Nouveau Front Populaire zesummekommen, dorënner och d'Lucie Castets, déi lénks-gréng Kandidatin fir de Poste vum Premier. Am Virfeld vun de Gespréicher huet sech d'Lénksallianz an engem oppene Bréif zu Wuert gemellt an d'Ofwaarde vum Macron no de Walen Ufank Juli schlëmm a schiedlech genannt.
Den Nouveau Front Populaire seet, et wier ee prett fir eng Regierung ze forméieren an datt an enger parlamentarescher Demokratie de Regierungsoptrag un de Walgewënner sollt goen, an dësem Fall also u si. D'Lucie Castets war gëschter zu Tours bei den Ekologisten a sot, eng Regierung ënner hir géing e radikale Changement mat sech bréngen.
Och Gespréicher mat de Rietsextreemen
Der Lucie Castets no wier eng Regierung vum Nouveau Front Populaire duerchaus capabel Accorden ze fannen. Dorunner zweiwelt een awer am Elysée. An engem Communiqué vun dësem heescht et, et bréicht elo eng stabil Regierung, déi net direkt duerch e Mësstrauensvott un d'Wackele kënnt. De Macron wëllt jo eng grouss Koalitioun ouni dee rietsen a lénke Bord.
No de Gespréicher mat der Lénksallianz trëfft sech de Macron am Nomëtteg och mat de Konservativen a sengem eegene Lager. E Méindeg dann nach mat de Rietsextreemen. Kuerz no dëse Gespréicher soll dann en neie Premier genannt ginn, warscheinlech schonn en Dënschdeg.