D‘Tester goufen d‘lescht Woch vum Inneministère annoncéiert. Den Alain Becker, Zoustännege fir d‘Sécurité civile am Inneministère, erkläert, datt dëst och net dee leschten Test wier. Als nächst soll d‘App getest ginn, déi déi al LU-Alert ersetze soll. An der App kann een astellen, wéi eng Alerten ee kréie wëll.
Bei villen Tester besteet natierlech d‘Gefor, datt d‘Leit se net méi eescht huelen, gëtt den Alain Becker zou. Et wier trotzdeem absolutt néideg.
"Et ass eigentlech an der Optik vun enger resilienter Gesellschaft, déi mer gär hätten, dass d'Leit och belaaschtbar sinn, datt se wëssen, dass eng early warning, och early actions mat sech bréngt.“
Et wéilt een dat, wat an der Theorie klappt, och mat der Populatioun testen.
Just bei akuter Gefor
Déi sougenannte Cell-Broadcast, wéi se e gëschter erausgaange sinn, sollen iwwerdeems just a ganz extreme Fäll benotzt ginn.
"Wou mir dann d'Leit och wierklech opfuerderen, direkt ze reagéieren, ze evakuéieren zum Beispill oder op eng akut Gefor hinzeweisen.“
Deen Test soll och maximal ee Mol am Joer getest ginn an d‘Leit géifen am Virfeld informéiert ginn.