De Premier Luc Frieden huet allefalls nach emol kloer gemaach datt hien déi Kandidatur zesumme mat där vun der Ursula von der Leyen als Kommissiounspresidentin géif ënnerstëtzen.
Déi studéiert Juristin Kaja Kallas wier eng Expertin am EU-Recht a si géif sech fir Demokratie a Sécherheet an Europa asetzen, sou de Luc Frieden.
Haart Linn géint russesch Invasioun
D’Kaja Kallas gëllt jo als staark Verfechterin vun enger ganz haarder Linn géint déi russesch Invasioun an der Ukrain, dat huet si och de mëtten nach eemol kloer gemaach:
„Ech mengen, datt den Ausgang vun dësem Krich essentiel ass, net nëmme fir déi osteuropäesch Staaten, mee fir déi ganz EU an déi transatlantesch Communautéit.“
Et dierft een net fäerten, d‘Victoire vun der Ukrain als Zil ze benennen, esou d‘estesch Premierministesch.
D‘Rolle wäerte sech änneren
Sollt d‘Kaja Kallas um Sommet wierklech zur EU-Aussebeoptraagten nominéiert ginn, wäert sech hir Roll awer änneren. Si ass sech bewosst, datt dann och a Saache Sécherheetspolitik Kompromësser musse gemaach ginn:
„Mir kënnen eis op dat konzentréiere wou mer eis eens sinn an dorop bauen.“
Luc Frieden: EU-Kommissäre gi vu Regierunge virgeschloen
Bilateral louch den Akzent op Digitaliséierung an dem Stäerke vun de Positioune vun de klenge Länner.
De Luc Frieden huet op Nofro hin och net-confirméiert Medieninformatiounen iwwert en däitsche Support fir den Nicolas Schmit als EU-Kommissär kommentéiert. Et misst een d‘Walresultat respektéieren an d‘Kommissäre géifen ëmmer nach vun den nationale Regierunge virgeschloe ginn, sou de Premier.