Déi israeelesch Arméi huet eegenen Aussoen no hënt 200 Ziler an der Gazasträif attackéiert. Dorënner eng Schoul, wou d‘Hamas eng Kommandozentral soll gehat hunn a wou et och ënnerierdesch Tunnelle goufen.
Israel gehäit der Hamas ëmmer rëm fir, Zivilisten als Schutzschëlder ze benotzen.
Extremistesch Palestinenser hunn awer och rëm Rakéiten a Richtung Israel geschoss, sou d‘Arméi. An Uertschaften un der Grenz mat der Gazasträif wier e puer Mol Rakéitenalarm ausgeléist ginn.
Attacken aus dem Libanon
Och un der Grenz tëschent Israel an dem Libanon koum et hënt nees zu Attacken. Wéi déi israeelesch Arméi matdeelt, wieren direkt e puer Ziler an Israel vum Libanon aus attackéiert ginn. Dobäi wieren dräi israeelesch Zaldote verletzt ginn. D‘Hisbollah huet sech zu den Attacke bekannt. Israel huet mat enger Géigenattack reagéiert.
