Et wéilt een d'Gemenge fit maache fir zukünfteg Generatiounen, esou de Buergermeeschter Jeff Gangler. Fir de Bierger:inne méiglechst vill Service ubidden ze kënnen, misst ee Ressourcë bündelen, an dat géif besser an der Fusioun goen.
Och de Marco Koeune, Buergermeeschter vun der Stauséigemeng, gesäit de Virdeel an der gedeelter Aarbecht. Et wier een net grad iwwerbesat, wat d'Personal op der Gemeng ugeet, esou de Marco Koeune. Do, wéi och op finanziellem Niveau, kéint eng Fusioun Entlaaschtung bréngen.
Eng héich Liewensqualitéit ubidden
An de leschte Joren huet d'Gemeng am Norde vum Land relativ vill Zouwuess kritt. Notamment wéinst de méi nidderege Logementspräisser wéi an der Stad, esou de Marco Koeune. Et wéilt een de Bierger:innen awer déi selwecht Liewensqualitéit bidde wat Crèchen a Sportsveräiner ugeet wéi an de Gemenge ronderëm Stad. Zu dësem Schluss kënnt de Buergermeeschter.
Eng Dräier-Fusioun mat der Nopeschgemeng Wanseler wier och am Gespréich, esou nach déi zwee Buergermeeschter. Dëst awer fréistens no den nächste Gemengewalen.
