Mëttlerweil géifen awer vill Fräizäitorganisatiounen Velostouren organiséieren, ouni datt d’Federatioun agebonnen ass. An dat géif gewëss Risike mat sech bréngen.
“Déi Gefor ass ganz einfach, datt do eppes Offizielles organiséiert gëtt, a laut Sportgesetz hu mir den Agrement dofir, a soss keen. A wann do eng Kéier een Accident geschitt, da well ech net an deenen hirer Haut stiechen."
D'Organisateure géingen zwar niewebäi Assurancen ofschléissen, mee wann eng Kéier ee Kand oder een Erwuessenen e Problem huet, da géing d'Sportgesetz gekuckt ginn, erkläert de Camille Dahm. "Da leien déi Organisatioune falsch”, seet den FSCL-President.
Ee Vëlodrom fir 36 Clibb: Geet dat duer?
De President vun der Vëlosportfederatioun hofft, datt de Vëlodrom zu Munneref an dräi bis véier Joer opgeet. An den nächste Woche missten d'Baggeren um Chantier ulafen, esou de Camille Dahm. Hie seet, de Vëlodrom wier eng wichteg Saach fir all d’Vëlosclibb am Land.
Mee geet een eenzege Vëlodrom iwwerhaapt duer fir 36 Clibb? De Camille Dahm mengt dat schon.
“Wa mir dat vun de Plagen hir richteg andeelen, dann ass de Vëlodrom schonn eng ganz gutt Saach. Et geet jo net drëms, just um Vëlodrom ze sinn, mee do kënne mir ganz vill elementar Techniken trainéieren. An d’Sécherheet ass och garantéieren.”
Ee genauen Datum fir d'Fäerdegstellung gëtt et awer nach net.