Zënter Dezember zejoert kann een en Zertifikat vum INLL ausgestallt kréien, deen d’Fäegkeete vun der Lëtzebuerger Orthografie beleet. De Luc Schmitz, Direkter adjoint vum INLL, erkläert am 100,7-Interview, datt een deen Test net einfach ka spontan maachen. Et muss een sech dofir als éischt um Site vum INLL umellen.
Multiple Choice Test vu 40 Minutten
Den Test selwer mécht een dann am Gebai vum INLL. Et gi reegelméisseg Sessiounen dofir. Den Test dauert 40 Minutten a besteet aus 90 Froen.
“Dat ass absolut machbar. Also elo aus de leschten Erfarungekënne mir soen, datt d'Leit sou tëschent 25 an 30 Minutte brauchen. Also 40 Minutte geet wierklech largement duer.”
Et ass iwwerdeems keen Test, deen e besteet oder net besteet, mee et ass en Test, bei deem um Enn e gewësse Prozentsaz vu richtegen Äntwerten erauskënnt. De Prozentsaz steet dann um Zertifikat, deen een iwwer d’Post heem geschéckt kritt.
Demoversioun fir auszetesten
Et muss en d’Äntwerten och net selwer schreiwen. Et ass e Multiple Choice Test, mat ëmmer véier Äntwertméiglechkeeten.
Et kann een um Site vum INL eng Demoversioun uklicken, do sinn zwar nëmme 15 Froen, mee da gesäit een ongeféier wéi et geet.
Offiziell gëtt den Zertifikat nach néierens gefrot, et kéint awer en Atout fir de Patron sinn.
Den Test kann een iwwerdeems sou dacks maache wéi ee wëll, e kascht awer 30 Euro.
Déi nächst Sessioun ass den 23. Abrëll.
