De 15. Juni huet an der Gare um Belval d’Haus vum Vëlo seng Dieren opgemaach. Den Escher "Collectif Citoyen pour le climat" an "Vélorution“ stiechen hannert dëser Iddi.
Eng Plaz fir sech ze treffen an ze diskutéieren
Eigentlech sinn et zwee kleng Kiosken op der Gare um Belval, déi fir dësen Zweck extra equipéiert gi sinn. De Jean Larock empfänkt d’Leit, déi dohi kommen. Mat der Maison du Vëlo wollten d‘Vëlsoaktivist:inne vu Velorution an Escher Klimaaktivist:inne de Leit eng Plaz ubidden, wou si hir Vëloe selwer kënne reparéieren.
„Mir hu geduecht, mir hätte gär eng Plaz, wou mir eis kënnen treffen, diskutéieren, Projete maachen a sou weider. An dann ass d’Iddi gebuer: Mir brauchen en Haus vum Vëlo.“
"Selwer maachen"
Fir eng Memberskaart vun 30 Euro kann ee mat sengem Vëlo op d‘Plaz kommen a vum gutt equipéierten Atelier profitéieren. De Prinzip ass deen, datt d‘Leit léieren, hire Vëlo ze reparéieren. "Selwer maachen" ass den Devis.
Berode loosse kann ee sech da vum Vincent Muller. Hien huet fréier als Mecanicien bei enger Profiekipp geschafft. Elo hëlleft hie fräiwëlleg mat Rot an Dot aus.
Bis ewell positive Bilan
De Betrib, deen ënner anerem vun den Oeuvre Grande Duchesse Charlotte an de Membere finanzéiert gëtt, leeft, betount de Jean Larock.
„On est ouvert tous les jours en fin de journée de 17 heures à vingt heures et à chaque fois, il y a plusieurs personnes qui viennent nous rendre visite avec une question ou un vélo à réparer.“
Bis Enn dës Joers wëll een de Bilan maachen. Bis elo allefalls ass dee ganz positiv.