D'Volkswagen AG deet sech relativ schwéier domat, op déi nei Realitéiten um Autosmarché ze reagéieren. VW hänkt zum Beispill bei der Ëmstellung op Elektroautoe senge grousse Konkurrenten hannendrun.
Dat heescht: VW brauch Suen. Konkret ass rieds vu 4 Milliarden Euro, déi d'VW-Cheffen duerch déi Spuerpläng, déi elo bekannt gi sinn, wëllt eranhuelen. Fir se duerno an déi nei Technologien ze investéieren. Am September hat VW schonn ugekënnegt, datt si misste spueren. Do gouf ënner anerem déi sougenannte Jobgarantie gekënnegt, déi zanter 30 Joer gegollt huet.
Gewënnmarge ass erofgaangen
Der Entreprise no wieren et virun allem d’Personalkäschten, déi VW belaaschten. Alles an allem schaffe weltwäit méi wéi 684.000 Leit fir VW. D'Firma huet am leschte Joer bal 50 Milliarden Euro u Salairen ausbezuelt. Problematesch fir d’VW-Mataarbechter:innen hei an Däitschland ass elo: Si verdéngen e gutt Stéck méi wéi hir Aarbechtskolleegen a Süd- oder Osteuropa. Dowéinst soll elo un hinne gespuert ginn. De Problem vun den héije Personalkäschten hunn och aner Autosproduzenten. Mee: Well VW esou grouss ass, ass de Problem an absolutten Zuele bei VW och méi gravéierend.
Gläichzäiteg mécht VW als Konzern awer nach ëmmer Gewënner a Milliardenhéicht. Och de Conseil d’administration verdéngt Millioune-Salairen. Et ass also net esou, wéi wa VW géif riseg Verloschter maachen. Hir Gewënnmarge ass allerdéngs erofgaangen, well besonnesch d'Autoe vun der Kär-Mark VW sech manner gutt verkafe wéi fréier. Net just an Europa, mee och zum Beispill a China, wou VW laang Zäit enorm vill Sue verdéngt huet.
Bundesland Niedersachsen stëmmt bei wichtegen Decisioune mat of
Och de Bundeskanzler Olaf Scholz rifft VW dozou op, Aarbechtsplazen ze erhalen. D'Politik ka bei VW effektiv Afloss op zentral Decisiounen huelen, well dem Bundesland Niedersachsen, wou VW säi Siège huet, 20,2 Prozent vun den Aktie vu VW gehéieren. D’Land kann also bei wichtegen Entscheedunge mat ofstëmmen, huet souguer de facto e Vetorecht.
Mam niedersächsesche Ministerpresident Stephan Weil a sengem Wirtschaftsminister setzen och zwee Regierungsmemberen am Aufsichtsrat. Alle béid si Membere vun der SPD, also der Partei vum Bundeskanzler Olaf Scholz. Wann d'Bundesregierung also wëllt Drock op VW maachen, da féiert de Wee iwwer d'Regierung vun Niedersachsen.
Gespréich mam München-Korrespondent Matthias Kirsch