D'Feierlechkeete stoungen awer am Schiet vun den temporäre Grenzkontrollen, déi zéng Länner nees ageféiert hunn, dorënner Däitschland. Lëtzebuerg ass net frou doriwwer an huet dowéinst d'EU-Kommissioun am Februar opgefuerdert ze kucken, ob déi Grenzkontrollen néideg an ubruecht sinn.
Den Inneminister Leon Gloden erwaart sech vun der Kommissioun eng Äntwert am Oktober, seet hien am 100,7-Interview. An d'Kommissioun géif och äntweren, sot gëschter Owend am 100,7 Interview den zoustännegen EU-Kommissär Magnus Brunner, deen och bei de Feierlechkeeten zu Schengen derbäi war. Wéini genee d'Kommissioun Lëtzebuerg äntwere wäert a wat ee sech vun där Äntwert erwaarde kann, huet den EU-Kommissär awer net preziséiert:
"Die Europäische Kommission ist die Hüterin der Verträge, und wir werden das ganz genau beobachten, wie sich die Entwicklung zwischen den Mitgliedstaaten, die betroffen sind, weiterentwickelt."
Den däitschen Inneminister Alexander Dobrindt war iwweregens bei där symbolescher Schëfffaart vun den Inneministeren op der Musel net derbäi.
