Vun dësem Samschdeg u sollen Douanestaxe vun 10 Prozent op Importer aus alle Länner ageféiert ginn. Jee nodeem wéi den Handelsdefizit vun den eenzele Staate mat den USA ass, ginn déi Taxen nach méi héich. Fir Importer aus der EU solle vum 9. Abrëll un 20 Prozent Douanestaxe gëllen. Fir China souguer 34 Prozent.
Dem Trump säin Zil ass et, USA dovunner ofzehalen, Produiten aus dem Ausland anzeféieren, hie wëllt esou déi eege Wirtschaft ukuerbelen.
Analyste soen, datt d'Decisioun d'Weltwirtschaft massiv wäert bremsen. D'Konsumenten an den USA wäerte méi héich Präisser musse bezuelen, mee och an Europa, an an aneren Deeler vun der Welt wäert dëst ze spiere sinn.
Eng Gefor fir d'Weltwirtschaft
D'Reaktiounen aus aller Welt op dem Donald Trump seng Annoncë si schaarf. Vu Peking war et d'Opfuerderung, déi Decisioun direkt zeréckzezeien, se géif d'Entwécklung vun der Weltwirtschaft a Gefor bréngen.
D'Europäesch Kommissiounspresidentin Ursula von der Leyen sot um Donneschdegmoien et wier net ze spéit fir ze negociéieren. Si huet awer och kloer gemaach, datt d'EU prett wier ze äntweren. D'Annonce vum amerikanesche President wier ee schwéiere Coup fir d'Weltwirtschaft. Si géif déi Decisioun zu déifst bedaueren, esou d'Ursula von der Leyen.
D'Douanestaxe wäerten direkt ze spiere sinn, mat enger Inflatioun, déi klamme wäert, esou datt all d'Entreprisen, ob grouss oder kleng, vum éischten Dag un drënner ze leiden hätten.
D'EU wäert zesummenhalen a sech fireneen asetzen, esou nach d'Ursula von der Leyen - et wieren och Mesurë virgesi fir déi Secteuren, déi direkt betraff sinn ze ënnerstëtzen.
