D’Europäesch Unioun bleift virsiichteg an hirer Reaktioun op d’Ukënnegung vun den USA fir nei Douanes-Taxen op europäesch Importer.
EU-Approche: fir d’éischt mol verhandelen
Et wier een am gaangen ee Pak mat Géigemesuren ze präparéieren, sot um Donneschdeg d’Kommissiounscheffin Ursula von der Leyen. Fir de Moment gëtt awer net gesot, wat genee an deem Pak dran ass.
D’EU setzt weider drop, mat den USA ze verhandelen, esou d’Ursula von der Leyen. Dat an net d’Konfrontatioun wier dee richtege Wee.
Och am Europaparlament vertrëtt een déi Approche. Mee wouriwwer genee mat den USA soll verhandelt ginn, datt wier d’Fro, gëtt de Bernd Lange, de President vun der Handelskommissioun am Europaparlament zou.
“Wir haben immer Gesprächsangebote gemacht, das ist immer abgelehnt worden. Erst mal müssen wir wissen, wo eigentlich Vehandlungsbereitschaft auf der Seite der USA besteht. Das ist im Moment das grosse Problem.”
Iwwert d’Héicht vun europäesche Géigentaxen kéint een diskutéieren. An och doriwwer, wou europäesch Investitiounen an den USA kéinte gemaach ginn.
Wat awer net zur Diskussioun stéing, dat wier d’Ännere vun europäesche Gesetzer, wéi zum Beispill dat iwwer digital Servicer.
Eenzel Accorde mat den USA: Net méiglech fir d’EU-Länner
Et géif ee probéieren, een Accord mat den USA auszeschaffen, dat hat um Donneschdeg schonn déi italieenesch Premierministerin Georgia Meloni gesot.
Datt d’Länner bilateral mat den USA verhandelen ass méiglech. Awer een Accord kënne si net ofschléissen, stellt de Bernd Lange kloer. Dat ka just d’EU-Kommissioun maachen.
“Es gibt unter den Ländern unterschiedliche Interessen, keine Frage. Es ist aber völlig klar, dass Handelspolitik EU-Zuständigkeit ist.”
Iwwert d’Produkter, déi duerno op enger eventueller Lëscht vun europäeschen Taxe stinn, géing natierlech an der EU ënnereneen diskutéiert ginn.
“Die Liste ist von vielen Interessensgruppen begutachtet worden. Und da gab es Sektoren, wie der Alkoholsektor, die gesagt haben, warum müssen wir da mit drin sein? Letztendlich wird diese Liste aber zusammen beschlossen werden. Und das ist dann das gemeinsame Projekt der Europäischen Union, da gibt es kein Ausscheren.”
D’Decisioun iwwer eventuell europäesch Géigentaxe kéint déi nächst Woch falen. Vill Zäit fir ze verhandele bleift deemno net.
