Fir dee 27 Joer ale Recurve-Spezialist (esou e Bou huet ënner anerem e Viséier an et sinn Hëllefsmëttele fir d’Stabilisatioun erlaabt) ass et déi éischt Participatioun un Olympesche Spiller. 64 Athleeten trieden an der Recurve 70m-Klassementsronn un: Do gëtt dann de Géigner an den 32els-Finallen ermëttelt, déi en Dënschdeg sinn. De Pit Klein huet bis elo eng Beschtleeschtung vu 672 vu 720 méigleche Réng opweises.
De Bouschéisser huet sech op de leschte Stëppel fir Paräis qualifizéiert, iwwer eng néngte Plaz beim rezente Weltcup zu Antalya an der Tierkei. 2018 hat hien zesumme mat sengem Brudder Joe a mam Jeff Henckels an der Ekipp d'Bronzemedail op der Europameeschterschaft gewonnen.
Den Nei-Olympionik huet an der Famill Bouschéisser ronderëm sech: Seng Fra Mariya ass schonn international fir d'Ukrain a Polen ugetrueden a mécht dat elo fir Lëtzebuerg, a säi Brudder Joe a säi Cousin Luca sinn och mam Bou aktiv. De Pit Klein huet virun 10 Joer beim Weltcup zu Antalya an der Tierkei säin internationalen Debut ginn, 5 Joer nodeems hie mam Sport ugefaangen hat.