arrow_back_ios

100komma7.lu

100komma7.lu

/ Froestonn an der Chamber: De Marc Baum mat hefteger Kritik um Luc Frieden

Caritas

|
reading time

2 min

Froestonn an der Chamber: De Marc Baum mat hefteger Kritik um Luc Frieden

An enger Aktualitéitsstonn an der Chamber iwwert d’Caritas-Affär gouf et den Donneschdeg Nomëtteg ferm Kritik vum Marc Baum um Luc Frieden. D’Caritas wier hei Affer an net Täter, huet den Deputéierte vun déi Lénk gemengt.

reading time

2 min

Marc Baum an der Chamber | © Flickr Chambre des Députés
Marc Baum an der Chamber (Foto: Flickr Chambre des Députés)

Den Ënnergank vun der Hëllefsorganisatioun wier awer dee Moment kloer gewiescht, wéi de Premier sot, d’Caritas géif kee Su méi vum Staat kréien. Dat wier Doudesurteel fir d’Affer gewiescht, sou de Marc Baum.

play_arrow De Marc Baum

"De Premier, dee sech ëmmer nees gär als CEO gesäit, wär bei deem miserable Management bei all privatem Betrib scho längst entlooss ginn, an dat aus engem ganz einfache Grond: Well e géint den Objet social vun deem Betrib verstouss hätt!"

De Luc Frieden huet dorop geäntwert, datt et extrem blessant wier, wa gesot géif ginn, d’Regierung hätt hei e kaalt Häerz gewisen.

play_arrow De Luc Frieden

"Well wann et eis egal gewiescht wier, dann hätte mer gesot ‚ha, tant pis, et ass eng Gesellschaft, do si Sue geklaut ginn, eng ONG, déi hate mer zwar gär, mee et ass eis egal. Et war eis net egal, an et ass eis bis haut net egal."

Hien hätt sengerzäit gesot, d’Caritas géif kee Su méi kréien, well net gewosst war, wéi déi 61 Milliounen Euro verschwonne sinn, sot de Premier. Donieft hätten d’Banke geschriwwen, datt Suen déi der Caritas sollen iwwerwise ginn, eigentlech de Banke géife gehéieren.