De Minister Gilles Roth hat een Dënschdeg gesot, datt dës Reform wéi bis elo virgesinn am Joer 2028 soll a Kraaft trieden.
CSL begréisst Moderniséierung vum System
Vum Prinzip hier begréisst d’CSL den Text fir d’Moderniséierung vum Besteierungssystem. Den Direkter vun der Salariatskammer Sylvain Hoffmann:
“Et kënnt net méi zu esou komesche Situatiounen, wann et eng Scheedung oder ee Stierffall, datt een dann an enger schwiereger privater Situatioun och nach steierlech gesinn eng op den Deckel ka kréien, eeben duerch dee Barème unique.”
Kritik un der Steiergerechtegkeet
Donieft begréisst d’CSL déi geplangten Entlaaschtung vu Stéit mat niddregen an duerchschnëttleche Léin.
“Et ass awer leider esou de Fall, datt och déi héich Revenue vun der Reform profitéieren. An do hätte mir et u sech léiwer gesinn, datt een effektiv do um Barème eppes gemaach hätt, fir zum Beispill de Spëtzesteiersaz ze héijen.”
Dat wier den Haaptkritikpunkt, datt d’Steierreform net zu méi Steiergerechtegkeet féiert, esou de Sylvain Hoffmann.
“An dann ass et natierlech och esou, datt et effektiv net zu méi enger staarker Besteierung kënnt vu Kapitalerträg, déi jo largement favoriséiert si par Rapport zu de Salairen, an och net zu enger méi staarker Besteierung en général vum Patrimoine.”
Een Drëttel vun de Menagë kéint verléieren
Well d’Reform zum Deel iwwer eng net-Upassung vum Steierbarème un d’Inflatioun soll finanzéiert ginn, kéint een Deel vun de Leit bei der Steierreform verléieren, esou den Direkter vun der CSL.
“An dat ass awer ronn een Drëttel vun de Menagen, déi an deem Sënn Perdant sinn, well si d’Reform mat virfinanzéieren.”
No der Iwwergangsphas vu 25 Joer fir bestueten a gepacste Koppelen, fir nach gemeinsam besteiert ze ginn, misst och gekuckt ginn, ob net Leit dee Moment massiv méi Steiere bezuelen, huet den CSL-Direkter erkläert.
