Also e bësse sportlech ass hien nach, de Lionel Sabatté: hie schaaft Gymnastikapparater fir eis Imaginatioun. Dat ass gutt fir de Kapp, also fir d'Gesondheet. Fäerdeg verpaakte Messagë liwweren anerer.
Fossilien als Basis
Dem Lionel Sabatté seng Peinturen, Groussformater an 2D, sinn abstrakt, seng Skulpturen, also säin 3D, figürlech. De Stoff, aus deem dem Lionel Sabatté seng Dreem sinn, ass organesch, mee, kleng Präzisioun, mausdout.
D'Basis vu sengen Ueleg- oder Acrylfaarwe si Fossilien, fir seng ganz perséinlech Fauna a Flora benotzt hien ofgestuerwent Planzematerial, Huff, ofgebass Neel, Stëbs, raschtege Metall.
Wat ass lieweg?
Saache gi lieweg, wa se dialogéieren: dat ass fir Kanner evident. E Petzi ass erwuesse gekuckt allerdéngs dout. Deemno ass de Lionel Sabatté op der Sich no enger Redefinitioun vum Liewegen, vun engem anere Bléck. Zum Beispill am Paräisser Metro.
Des moutons pour faire des loups! Duerch säi Stëbs-Ruddel Wëllef, dat hie fir d'FIAC, d'Paräisser Konschtfoire, sculptéiert hat, ass och d'Ëffentlechkeet op de Lionel Sabatté opmierksam ginn.
E Liewen tëschent zwee Stied
De Lionel Sabatté beschäftegt sech am Alldag intensiv mat zwee Labyrinther: hie lieft nämlech bal zu Paräis, bal zu Los Angeles.
Dohannen huet hien och d'Galeriste Ceysson et Bénétière kenne geléiert, déi vun enger Sabatté-Expo an der City of Angels esou begeeschtert waren, datt si hie mat sengen Aarbechten op de Wandhaff invitéiert hunn.