Ëffentlechen Transport Zuchverbindung Lëtzebuerg - Saarbrécken momentan keng Optioun
Saarlännesch Frontaliere musse besser op Lëtzebuerg pendele kënnen, seet de President vun Die Grünen am Saarland. Eng direkt Zuchverbindung wier e "pharaonesche Projet" heescht et beim Transportministère zu Lëtzebuerg.
Eng direkt Zuchstreck tëscht Saarbrécken an der Stad Lëtzebuerg ass momentan keng Optioun, seet den Transport- an Infrastrukturministère. Dës Propos gouf rezent vum President vun Die Grünen am Saarland lancéiert. Saarlännesch Frontaliere missten effikass op Lëtzebuerg pendele kënnen, ouni d'Stroossennetz zousätzlech ze belaaschten, sou de Markus Tressel.
Eng direkt Zuchstreck tëscht dem Saarland a Lëtzebuerg géif momentan kee Sënn erginn, seet d'Pressespriecherin Dany Frank. Et wier ass schonn eng Etude gemaacht ginn, fir ze kucken ob eng Zuchstreck tëscht Saarbrécken a Lëtzebuerg géif Sënn maachen. Déi hätt erginn, datt den existente Schnellbus der Demande op där Streck am Beschte gerecht gëtt.
Wann een eng direkt Eisebunnsverbindung wéilt ustriewen, misst een d'Waasserleef analyséieren an et misste kilometerlaang Tunnele gebaut ginn, seet d'Dany Frank. "An dat gëtt da wierklech zu engem pharaonesche Projet."
Méi zum Thema
Kommentar
Stau: Symptom vum Wirtschaftsmodell
An der Lëtzebuerger Verkéiersproblematik gëtt de Frontalierstrafic als een Haaptproblem genannt. En ass e Symptom vum Lëtzebuerger Wirtschaftsmodell. Konkret Mesurë sollen de Stau elo verhënneren.
"Lëtzebuerg ass nach ëmmer en Autoland"
Lëtzebuerg huet ee Verkéiersproblem, seet den däitsche Verkéierswëssenschaftler Heiner Monheim. Et misst ee vum Auto ewech kommen. Eng méiglech Léisung gesäit hien an engem Tram-Train.
