Déi Leit, déi am neie Co-Working-Space wäerte schaffen, solle virun allem manner Zäit fir de Wee op d'Aarbecht brauchen, an et sollen deemno Kuelendioxid-Emissiounen evitéiert ginn. D'Büros-Struktur zu Schiere wier eng Alternativ fir den Télétravail vun doheem aus, esou de Minister Marc Hansen bei der Presentatioun.
"Den Employeur Staat, dee muss och kucken, dass e seng Leit (...) éischtens fënnt a se och gehale kritt. Mir sinn och do an engem héich kompetitive Marché, wou och Leit bei eis wëlle schaffe kommen, déi no esou Alternativen och froen."
De Buergermeeschter Eric Thill huet déi gutt Ubannung vum Co-Working-Space zu Schieren als ee weidere Virdeel genannt.
No zwee Joer soll de Bilan gezu ginn
Bis d'Büroen zu Schieren dësen Dezember opginn, soll analyséiert ginn, wéi eng Mataarbechter aus de béide Ministèren a Fro komme, fir fräiwëlleg vun do aus kënnen ze schaffen. Zwee Joer laang soll de Co-Working-Zenter dann als Pilotprojet funktionéieren, erkläert de Marc Hansen.
"A wann dat ee Succès gëtt, maache mer et natierlech och op fir aner Ministèren."
Fir d'Bürosfläch a fir verschiddenen Déngschtleeschtungen, bezilt de Staat der Gemeng Schieren ee Loyer vun 12.500 Euro pro Mount.
