Déi rezent Videoen op de soziale Reseauen zu Lëtzebuerg, wou eng Schülerin vun enger anerer geschloen an erniddregt gëtt, hätt si schockéiert, esou d'Judith Reicherzer am 100,7 Interview. Op de Biller, déi an Tëschenzäit deelweis vu Facebook erofgeholl goufen, gouf déi mannerjäreg Schülerin vun enger aner jonker Schülerin geschloen an erniddregt, wärend ronderëm aner Jonker nogekuckt an d'Aktioune gefeiert hunn. D'Zeen huet sech op der Paräisser Plaz an der Stad ofgespillt. D'Schüler sollen aus dem Mamer Lycée Josy Barthel gewiescht sinn, verschiddener och aus dem Aline Mayrisch, dorënner d'Affer. D'Jugendschutz-Sektioun vun der Police judiciaire huet eng Enquête opgemaach.
Am Lycée Aline Mayrisch wier ee sech scho méi laang iwwert d'Problematik vu Gewalt an Challenges bei Jonke bewosst gewiescht, seet d'Judith Reicherzer. De Lycée hätt eng Strategie ausgeschafft gehat, fir besonnesch d'Schüler:innen op den ënneschte Klassen ze sensibiliséieren. Wéinst dem Video an dem Schock, den doduerch ausgeléist gouf, wier dat elo virgezu ginn. Um Freideg Moie Moie wiere Responsabeler aus der Schoul an déi respektiv Klassen (7ème, 6ème a 5ème) gaangen, fir mat de Kanner allgemeng iwwer de Phenomen ze schwätzen. A fir ze soen, datt et am Lycée guer kéng Toleranz géif ginn, fir bei esou Challenges mat ze maachen, mee och net fir no ze kucken, oder d'Gewalt ze filmen a weider ze verbreeden.
Den Autoritéiten no, geet d'Enquëte an dësem Fall a Richtung Coups et blessures volontaires. Et géife keng Indicë ginn, datt et sech hei em eng sougenannt "Challenge" gehandelt hätt.
