Eng vun dëse Privatpersounen ass d'Laurence. Si huet sech den 8. Mäerz gemellt fir ukrainesch Flüchtlinge bei sech opzehuelen, bis haut huet si awer nach kee konkrete Retour kritt, zielt si.
Am Virfeld: Visitte bei de Leit doheem
Souwuel d'Caritas wéi och d'Croix Rouge schécke Vertrieder bei d'Leit heem fir ze kucken, ob verschidde Krittären erfëllt sinn, zielt d'Nadine Conrardy vun der Croix Rouge.
Et géif ënner anerem gekuckt ginn, ob d'Wunneng grouss genuch ass, an et géif och een Extrait aus dem Casier judiciaire gefrot ginn.
D'Laurence fënnt et zwar gutt, datt d'Caritas an d'Croix Rouge bei d'Leit heem gi fir ze kucken, wou déi ukrainesch Familljen ënnerkommen.
An awer fënnt si et "zermürbend" fir ze waarden, ouni ze wëssen, wéini een "endlech hëllefe kann". Dat wier fir all déi Bedeelegt net schéin, seet d'Laurence.
Eng Kontaktpersoun, falls Problemer entstinn
D'Nadine Conrardy organiséiert bei der Croix Rouge dës Hausvisitte bei Familljen, déi eng Plaz proposéieren. Dat Zesummeliewe misst nämlech geplangt ginn, ënnersträicht si: déi zwou Säite misste preparéiert sinn, well et géif ee sech dat eventuell anescht virstellen, wéi et am Endeffekt ass.
"Et stellt ee sech et vläicht méi einfach vir. Et si Leit, déi aus engem Kontext kommen, dee ganz schwiereg ass", ënnersträicht d'Nadine Conrardy.
Et kéint sinn, datt déi Leit traumatiséiert sinn. Dofir wier et gutt sech dorobber virzebereeden an eng Kontaktpersoun ze hunn, bei där ee sech melle kann, sollten et Problemer ginn.
Eegeninitiative solle gutt iwwerluecht sinn
Wéi laang et dauert, bis Flüchtlinge kënne raplënneren, hänkt vu Fäll zu Fall of. An Tëschenzäit gi verschidde Leit Flüchtlingen op eege Fauscht sichen, sief et an eng Noutstruktur hei am Land, oder beispillsweis a Polen.
Esou Eegeninitiative sollen awer gutt iwwerluecht sinn, ënnersträicht d'Nadine Conrardy. Et hätt ee schonn d'Situatioun gehat, datt Leit op eege Fauscht Flüchtlinge bei sech doheem opgeholl hunn, mee dat wier net esou gelaf, wéi si sech dat virgestallt hunn. Dat wier eng schwiereg Situatioun gewiescht, an d'Flüchtlingen hätten doropshi missten an eng Hal goen.
Privatleit, déi op Eegeninitiativ ukrainesch Bierger bei sech opgeholl hunn kënne sech och nach nodréiglech bei der Caritas oder Croix Rouge fir de Suivi mellen, ergänzt d'Nadine Conrardy.
Zanter dem 24. Februar hu méi ewéi 3,6 Millioune Mënschen d'Ukrain verlooss - zum groussen Deel Fraen a Kanner. Ronn 3.600 Persounen hu sech um Immigratiounsbüro hei am Land fir eng Protection temporaire registréiert a knapp 1.400 Persoune sinn an de Strukture vum ONA ënnerbruecht.
