Sanktiounen Ukrain-Kris: Nëmme wéineg Impakt op Finanzplaz Lëtzebuerg

Mat der Ukrain-Kris an dem Risiko vu weidere Sanktioune géint Russland stellt sech och d'Fro vum Impakt op déi Lëtzebuerger Ekonomie an op d'Finanzplaz. Vereenzelt gi sech Suerge gemaach: dat gëllt virun allem fir Lëtzebuerger Industriebetriber wéi ArcelorMittal, Guardian oder Paul Wurth.

Jacques Ganser / cbi

Finanzen
Symbolbild. Foto: Bigstock / vectorfusionart

Lauschteren


Sanktioune kéinten zum Beispill Siderurgiesprojete vu Paul Wurth-SMS a Russland an an der Ukrain direkt betreffen. Vun do heescht et dann och, datt een d'Situatioun géif observéieren.

0,31 Prozent vun der Gesamtzomm kéint betraff sinn

2020 huet Lëtzebuerg e Gesamtvolume vu 598 Milliounen Euro a Russland exportéiert, dovunner 407 Milliounen Euro Wueren, an 191 Milliounen Euro Servicer, dovunner 35 Milliounen Euro Finanzservicer, sou den Steven Koener vun der Chambre de Commerce.

Lëtzebuerg ass zwar an de leschte Joren ee vun de gréissten Investisseuren a Russland ginn, dat läit awer an der Haaptsaach an der Natur vun der internationaler Finanzplaz. Sou gesäit de Marc-André Bechet vun der ALFI hei kee groussen direkten Impakt.

Lëtzebuerger Fongen, déi a Russland investéieren, sief et an Aktien oder Obligatiounen, géifen eng 18 Milliarden Euro ausmaachen. Och wann dat no vill géif kléngen, sou wier dat awer nëmmen 0,31 Prozent vun der Gesamtzomm.

SWIFT: Sanktioune géifen och europäesch Firme betreffen

D'Finanzplaz war laang Zäit interessant fir russescht Kapital, mat East West Bank, Gazprombank, Alfa.Bank an RCB sinn och russesch Banken zu Lëtzebuerg aktiv.

Sanktiounen hätten hei awer wuel haaptsächlech en Impakt op Aktien an Obligatioune vu russesche Staatsentreprisen, an op d'Privatkapital vu Leit ronderëm de Wladimir Putin, sou den Nicolas Mackel vu Luxembourg for Finance.

Dee warnt iwwerdeems virum Blockage vum internationale Bezuelsystem SWIFT. "Dat muss ee sech zweemol iwwerleeën, well da sinn net nëmmen d'Russe betraff, mee och déi däitsch oder franséisch Entreprisen, déi Wueren a Russland verkafen an dann net méi bezuelt ginn."

Och den Nicolas Mackel schwätzt vun engem marginalen Impakt vun de russesche Finanzaktivitéiten am Kontext mat der Finanzplaz: hie schwätzt vun engem bis zwee Prozent vun den Aktivitéiten. Et wier also näischt, mat deem Lëtzebuerg steet oder fält.

Méi zum Thema

Ukrain
Ukrain-Kris

An der Ukrain huet de President gëschter fir en "Dag vun der Eenheet" opgeruff. Dat war eng Reaktioun op déi vill Spekulatiounen, datt eng Invasioun vu Russland kéint op genee deem Dag gestart ginn.

Emmaunel Macron
Ukrain-Kris

Bei senger Visitt zu Moskau gouf et fir den Emmanuel Macron keen diplomateschen Duerchbroch. Hie reest elo op Kiew, mam Versprieche vum russesche President, datt weider Gespréicher mam Weste méiglech sinn.

Net verpassen

Dossieren

  • Gemengewalen 2023

    Den 11. Juni gëtt an de verschiddene Gemenge vum Land en neie Gemengerot gewielt. Wéi eng Sujete dominéieren d'Wal a wéi verleeft de Walkampf an de vereenzelte Gemengen?

  • Chamberwalen 2023

    Den 8. Oktober gëtt zu Lëtzebuerg en neit Parlament gewielt. Kann d'Dräierkoalitioun vun der DP, LSAP an déi gréng weider d'Regierung stellen, oder gëtt et ee Regierungswiessel?

Iwwert eis

De radio 100,7 ass deen eenzegen ëffentlech-rechtleche Radio zu Lëtzebuerg. E proposéiert Programmer op Lëtzebuergesch mat engem Fokus op Informatioun, Kultur, Divertissement a mat Akzent op d’klassesch Musek.

Weider liesen