D'lescht Woch hu véier franséisch Presidentschaftskandidate misste feststellen, datt se mat hire geopolitesche Prognosen doniewent gegraff hunn. De Kommunist Fabien Roussel, de lénke Kandidat Jean-Luc Mélenchon, d'Populistin Marine Le Pen an de Riets-Extremist Éric Zemmour: Alle véier hate si virdrun e prorusseschen Discours gefouert an hunn net gemengt, datt de Wladimir Putin géif ugräifen.
Zënter der russescher Invasioun hu si zwar dem ukrainesche Vollek hir Ënnerstëtzung zougesot, mee dat ännert näischt un hirer Verherrlechung vun der Autokratie virun der Invasioun. Aktuell kommen déi véier Kandidaten op insgesamt 47 Prozent vun de Walintentiounen.
D'Marine Le Pen evitéiert de Sujet Putin, souwäit et geet
Traditionell huet d'Extrême-Droite e Faibel fir Autokrate wéi de russesche President Wladimir Putin. Den Éric Zemmour mécht sech staark géint déi Schwaach am eegene Land, also d'Migranten, a weist sech schwaach géint déi Staark am Ausland, sief et e Victor Orban an eben e Wladimir Putin. Véier Deeg virun der Invasioun huet hien nach houfreg gemengt, Russland géif net ugräifen. Frankräich misst just besser mam Wladimir Putin verhandelen.
D'Marine Le Pen evitéiert de Sujet esou wäit et geet. An hirer Walcampagne am Joer 2007 huet nach de russesche Staats-Chef d'Kandidatin vum deemolege Front National am Kreml accueilléiert.
Och de Jean-Luc Mélenchon mécht keng gutt Figur
De pro-russeschen Discours vum Jean-Luc Mélenchon ass anescht. De Kandidat vun der France Insoumise seet vu sech selwer, datt hien dem Wladimir Putin säi gréisste politesche Géigner wier. Mee säi blannen Anti-Amerikanismus a seng EU-Skepsis féieren hien dozou, Russland an dubiéise Situatiounen ze verdeedegen. Zum Beispill wéi de syreschen Diktator Bashar al-Assad mat Hëllef vun de Russen d'Rebelle mat chemesche Waffen ugegraff huet, ass de Jean-Luc Mélenchon dovun ausgaangen, datt den Ugrëff vun Europa an den USA instrumentaliséiert ginn ass, fir an der Regioun militäresch ze intervenéieren.
Dem Macron seng Gewënnchancë vergréissere sech
Seng Rhetorik bleift haut änlech. De facto ass hien nämlech dogéint, datt d'Ukrain gehollef kritt. De Weekend huet hie getweet, datt de Krich an der Ukrain keng Excuse fir e Wettrëschten an Europa soll sinn. Anerersäits opposéiert sech de lénke Kandidat géint Sanktiounen, déi him no näischt bréngen.
Duerch de Krich an der Ukrain verléieren dem Emmanuel Macron seng Haaptkonkurrenten u Kredibilitéit. Si hunn dorops gepokert, datt et net zu engem Ugrëff kennt, a par conséquence eelzt hiren Anti-Nato-Discours schlecht. Dem President Macron seng Gewënnchancë bei de Presidentschaftswale vergréissere sech doduerch, ouni datt hie sech offiziell als Kandidat presentéiere muss an ouni datt säi Bilan vun de leschte fënnef Joer iwwerhaapt e grousse Sujet gëtt.
