Reform Reform vum Taxiwiesen: Positiven Avis vum Konkurrenzrot

Mam geplangte Gesetzesprojet géif eng Plaz geschafe gi fir déi, déi op de Taxi-Marché wéilten, heescht et am Avis vum Conseil de la Concurrence. Just eng Dynamiséierung vun der Offer kéint räsonabel Präisser fir Taxisfahrten a méi Rentabilitéit fir d'Entreprisë bréngen.

Serge Kesseler

En Taxi an der Nuecht
Foto: Bigstock

Lauschteren


De Konkurrenzrot approuvéiert dem Mobilitéits-Minister François Bausch säi Gesetzprojet vum Februar dëst Joer fir déi geplangten nei Taxis-Reform.

Den eenzege Wee fir d'Ziel vu räsonabele Präisser fir Taxifahrte mat enger Verbesserung vun der Rentabilitéit vun den Taxis-Entreprisen ze kombinéiere, wier eng Dynamiséierung vun der Offer, heescht et am Avis vum Conseil de la Concurrence vu gëschter.

D'gefuere Kilometer op e Maximum eropsetzen

Duerch d'Reform vum Taxi-Wiese géif eng Plaz geschafe gi fir déi, déi op de Marché wéilten. D'Entreprisë géife pousséiert ginn, nei Modeller ze adoptéieren, déi duerch den Digitaliséierungs-Fortschrëtt erliichtert ginn a warscheinlech zu Effizienzgewënner géife féieren, steet am Avis vum Konkurrenzrot ze liesen.

Dat éischt Ziel vun den Entreprisë dierft net sinn, déi héich Präisser bäizebehalen, mee d'Zuel vun de gefuerene Kilometere pro Dag oder Joer op e Maximum erop ze setzen. Et géif deemno ëm ekonomesch Effikassitéit a Rentabilitéit goen.

D'Reformpläng vum Taxiswiese gesi vir, datt déi territorial Limitatioun vun den Taxis-Lizenzen ofgeschaaft gëtt. All Taxi kéint dann am ganze Land fueren. Donieft soll d'Aschränkung vun der Zuel vu Lizenzen opgehuewe ginn. An et sollen ë.a. gesetzlech Dispositiounen och fir Servicer vu Locatiouns-Autoe mat Chauffeur agefouert ginn.

D'Wichtegkeet vum Secteur

Dem Konkurrenzrot no hätt den Taxis-Secteur eng Wichtegkeet, déi iwwer säi Gewiicht a Saache Wirtschaftsleeschtung eraus geet. Dëse Secteur géif eng komplementar Offer um Marché vum Persounen-Transport duerstellen, e kéint awer och den Image de Marque vum Land affektéieren.

Déi lescht Reform vun 2016/17 hat d'Zuel vun den Taxis-Zonë vu 44 op 6 reduzéiert an d'Präislimitatioune waren opgehuewe ginn.

Déi nei Taxis-Reform soll Ufank 2022 a Kraaft trieden, war an der Vergaangenheet ugekënnegt ginn.

Méi zum Thema

D'Taxiwiese soll reforméiert ginn
Taxireform

D'Reform vum Taxiwiese kënnt zu engem schlechten Zäitpunkt, doranner si sech den LCGB an d'Federatioun vun den Taxigesellschaften eens. D'Federatioun fäert katastrophal Konsequenze fir de Secteur.

D'Taxiswiese gëtt reforméiert
Reform vun der Reform

D'Taxiswiese gëtt weider liberaliséiert mam Zil fir d'Präisser an d'Offer ze verbesseren. An engem Projet de loi gëtt en neie legale Kader fir "Voitures de location avec chauffeur", wéi zB Uber, geschaaft.

Net verpassen

Programm

Dossieren

  • Dossier: Relatiounen tëscht Portugal a Lëtzebuerg

    Haut ass et den zweeten a leschten Dag vun der Staatsvisitt a Portugal. Eng grouss Lëtzebuerger Delegatioun ass den Ament zu Lissabon. An eisem Dossier fannt dir all eis Bäiträg an Artikelen iwwer d'Theema.

  • De Krich an der Ukrain

    De 24. Februar 2022 huet Russland d'Ukrain militäresch iwwerfall. Déi westlech Länner hu mat Sanktioune reagéiert, Millioune vu Leit sinn aus der Ukrain geflücht.

Iwwert eis

De radio 100,7 ass deen eenzegen ëffentlech-rechtleche Radio zu Lëtzebuerg. E proposéiert Programmer op Lëtzebuergesch mat engem Fokus op Informatioun, Kultur, Divertissement a mat Akzent op d’klassesch Musek.

Weider liesen